ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 15 ມັງກອນນີ້, ຢູ່ທຳນຽບຂາວນະຄອນຫຼວງວໍຊິງຕັນປະເທດອາເມຣິກາ, ທ່ານຫຼິວເຮີ້ ກຳມະການກົມການເມືອງສູນກາງພັກກອມມູນິດຈີນ, ຮອງນາຍົກລັດຖະມົນຕີຈີນ, ຫົວໜ້າຄະນະຜູ້ແທນຝ່າຍຈີນກ່ຽວກັບການເຈລະຈາເສດຖະກິດຮອບດ້ານຈີນ-ອາເມຣິກາ ແລະ ທ່ານໂດໂນ ທຣຳ ປະທານາທິບໍດີອາເມຣິກາໄດ້ລົງນາມໃນສັນຍາເສດຖະກິດການຄ້າໄລຍະທີໜຶ່ງລະຫວ່າງຈີນ-ອາເມຣິກາ. ມາຮອດນີ້, “ສົງຄາມການຄ້າ” ຈີນ-ອາເມຣິກາໄດ້ຢຸດຕິລົງເປັນແຕ່ລະໄລຍະ ແລະ ໄດ້ຢ່ວງບາດກ້າວຕົວຈິງໄປສູ່ທິດທາງທີ່ແກ້ໄຂບັນຫາຕໍ່ໄປໃນທີ່ສຸດ.
ຜົນງານດັ່ງກ່າວໄດ້ມາບໍ່ແມ່ນງ່າຍດາຍ ເຊິ່ງແມ່ນຈີນ ແລະ ອາເມຣິກາປຶກສາຫາລືກັນທາງເສດຖະກິດການຄ້າລະດັບສູງ 13 ຮອບ ໃຊ້ເວລາເຖິງ 23 ເດືອນ, ສອງຝ່າຍລ້ວນແຕ່ໄດ້ພະຍາຍາມຢ່າງລຳບາກ, ຈິ່ງປະສົບຜົນສຳເລັດດັ່ງກ່າວ. ນີ້ສະແດງໃຫ້ເຫັນວ່າ, ສອງຝ່າຍລ້ວນແຕ່ໄດ້ພິຈາລາເຖິງຜົນປະໂຫຍດຕົ້ນຕໍກັນແລະກັນ, ໄດ້ບັນລຸຄວາມສະເໝີພາບກັນ ແລະ ຮ່ວມມືກັນແບບຕ່າງຝ່າຍຕ່າງມີຜົນປະໂຫຍດ. ສັນຍາສະບັບນີ້ໄດ້ເປັນຄຳຕອບທີ່ດີໃຫ້ກັບຕະຫຼາດ, ສົມດັ່ງຄວາມຮຽກຮ້ອງຕ້ອງການຂອງປະຊາຊົນ ແລະ ສອດຄ່ອງກັບຜົນປະໂຫຍດຮ່ວມຂອງປະຊາຊົນສອງຊາດຈີນ-ອາເມຣິກາ ກໍຄືປະຊາຊົນທົ່ວໂລກ, ຍ່ອມຈະເປັນການຊຸກຍູ້ສັນຕິພາບ ແລະ ຄວາມຈະເລີນຮຸ່ງເຮືອງຂອງໂລກ.
ເມື່ອສັງເກດເບິ່ງເນື້ອໃນລະອຽດຂອງສັນຍາແລ້ວເຫັນວ່າ, ສັນຍາໄລຍະທີໜຶ່ງມີ 9 ພາກ ເຊິ່ງພົວພັນເຖິງຊັບສິນທາງປັນຍາ, ການຖ່າຍໂອນເຕັກນິກ, ອາຫານແລະຜະລິດຕະພັນກະສິກຳ, ການບໍລິການທາງການທະນາຄານ, ອັດຕາແລກປ່ຽນເງິນຕາ ແລະ ຄວາມໂປ່ງໃສ, ການເປີດກວ້າງການຄ້າ, ການປະເມີນຜົນລະຫວ່າງສອງຝ່າຍ ແລະ ການແກ້ໄຂຄວາມຂັດແຍ້ງກັນ. 3 ບັນຫາແກນກາງທີ່ຈີນຍຶດໝັ້ນ ຄື: ການຍົກເວັ້ນການຂຶ້ນພາສີໃນໄລຍະຫຼັງທັງໝົດ, ຕົວເລກຈັດຊື້ສິນຄ້າຕ້ອງສອດຄ່ອງກັບສະພາບຄວາມເປັນຈິງ ແລະ ເຮັດເປັນລາຍລັກອັກສອນໃນສັນຍາໃຫ້ມີຄວາມດຸນດ່ຽງກັນ ພ້ອມທັງສອງຫຼັກການ ຄື ກະຕິກາ WTO ແລະ ຫຼັກການຕະຫຼາດ ລ້ວນແຕ່ໄດ້ລະບຸໄວ້ໃນສັນຍາ. ຂະນະດຽວກັນ, ຄວາມຮຽກຮ້ອງຕ້ອງການຕົ້ນຕໍຂອງອາເມຣິກາກໍໄດ້ລະບຸໄວ້ຢ່າງລະອຽດໃນສັນຍາ. ສະຫຼຸບແລ້ວເຫັນວ່າ, ສັນຍາດັ່ງກ່າວມີລັກສະນະພິເສດສອງຢ່າງດັ່ງຕໍ່ໄປນີ້:
ໜຶ່ງແມ່ນໄດ້ບັນລຸຄວາມດຸນດ່ຽງກັນ. ສັນຍາທີ່ດີສະບັບໜຶ່ງແມ່ນບໍ່ຄວນເຮັດໃຫ້ພຽງໜຶ່ງຝ່າຍດຽວໄດ້ຮັບຜົນປະໂຫຍດເທົ່ານັ້ນ, ຫາກຄວນສະແດງໃຫ້ເຫັນເຖິງຄວາມສະເໝີພາບ ແລະ ກຽດສັກສີຂອງທັງສອງຝ່າຍ. ໂດຍຜ່ານການປຶກສາຫາລືມາເປັນຫຼາຍຮອບ, ສັນຍາໄລຍະທີໜຶ່ງໄດ້ບັນລຸຄວາມດຸນດ່ຽງກັນ.
ສອງແມ່ນບັນລຸການຮ່ວມມືແບບຕ່າງຝ່າຍຕ່າງມີຜົນປະໂຫຍດ. ນີ້ແມ່ນ ທາດແທ້ຂອງລັກສະນະການຮ່ວມມືທາງເສດຖະກິດການຄ້າຈີນແລະອາເມຣິກາ, ທັງເປັນເຫດຜົນທີ່ຂາດບໍ່ໄດ້ໃນສັນຍາໄລຍະທີໜຶ່ງນີ້. ພາຍຫຼັງລົງນາມໃນສັນຍາແລ້ວ, ບັນຫາສຳຄັນກໍແມ່ນຕ້ອງຈັດຕັ້ງປະຕິບັດສັນຍາໃຫ້ດີ. ເພື່ອເລື່ອງນີ້, ສອງຝ່າຍໄດ້ລະບຸກົນໄກປະເມີນສອງຝ່າຍ ແລະ ການແກ້ໄຂຄວາມຂັດແຍ້ງກັນຢ່າງລະອຽດຢູ່ໃນສັນຍາ, ຖ້າຝ່າຍໃດລະເມີດສັນຍາ, ລ້ວນແຕ່ຈະຕ້ອງຖືກລົງໂທດຕາມເນື້ອໃນຂອງສັນຍາ.
ໂລກປັດຈຸບັນພວມຜະເຊີນກັບສະພາບການປ່ຽນແປງໃຫຍ່ທີ່ບໍ່ເຄີຍມີມາກ່ອນໃນຮອບຮ້ອຍປີ, ຄວາມບໍ່ແນ່ນອນໃນການພັດທະນາໄດ້ນັບມື້ນັບເພີ່ມຂຶ້ນ. ໃນຖານະເປັນກຸ່ມເສດຖະກິດໃຫຍ່ອັນດັບໜຶ່ງ ແລະ ອັນດັບສອງຂອງໂລກ, ການພົວພັນທາງເສດຖະກິດການຄ້າຈີນ-ອາເມຣິກາມີຄວາມໝາຍສຳຄັນທີ່ສຸດຕໍ່ໂລກ, ສອງຝ່າຍໄດ້ລົງນາມໃນສັນຍາໄລຍະທີໜຶ່ງ, ຈິ່ງບໍ່ຕ້ອງສົງໄສເລີຍວ່າ, ຈະເຮັດໃຫ້ສະຖານະການການຄ້າອັນເຄັ່ງຕຶງໃນປັດຈຸບັນຜ່ອນຄາຍລົງ ແລະ ເພີ່ມຄວາມແນ່ນອນໃຫ້ແກ່ການພັດທະນາຂອງທົ່ວໂລກ.
ຄຳເຫັນ
0