ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 16 ມັງກອນນີ້, ກ່ອນຈະເດີນທາງໄປຢ້ຽມຢາມມຽນມາທາງລັດຖະກິດ, ທ່ານສີຈິ້ນຜິງ ປະທານປະເທດຈີນໄດ້ຂຽນບົດຄວາມທີ່ພາດຫົວຂໍ້ວ່າ “ຂຽນບົດຄວາມໃໝ່ກ່ຽວກັບມິດຕະພາບຖານອ້າຍນ້ອງຈີນ-ມຽນມາທີ່ມີປະຫວັດພັນກວ່າປີ” ລົງໜັງສືພິມ “ແສງສະຫວ່າງຂອງມຽນມາ”, ໜັງສືພິມ ຕາເກສປີເກນ ແລະໜັງສືພິມ The global new light of Myanmar. ບົດຄວາມລະບຸວ່າ, ພາຍຫຼັງສ້າງຕັ້ງສາຍພົວພັນທາງການທູດເປັນເວລາ 70 ປີຜ່ານມາ, ຈີນແລະມຽນມາໄດ້ລິເລີ່ມແລະປະຕິບັດຕາມ 5 ຫຼັກການຢູ່ຮ່ວມກັນໂດຍສັນຕິ, ສ້າງຄວາມໄວ້ເນື້ອເຊື່ອໃຈກັນ, ເຄົາລົບນັບຖືແລະສະໜັບສະໜູນເຊິ່ງແລະກັນມາໂດຍຕະຫຼອດ, ໄດ້ສາງແບບຢ່າງທີ່ທີ່ປະເທດໃຫຍ່ແລະປະເທດນ້ອຍມີຄວາມສະເໝີພາບກັນ, ຕ່າງຝ່າຍຕ່າງມີຜົນປະໂຫຍດແລະພັດທະນາຮ່ວມກັນ, ເຊິ່ງໄດ້ສ້າງຜົນປະໂຫຍດຢ່າງແທ້ຈິງໃຫ້ແກ່ປະຊາຊົນທັງສອງປະເທດ. ຄວາມໄວ້ເນື້ອເຊື່ອໃຈກັນດ້ານການເມືອງລະຫວ່າງສອງປະເທດມີພື້ນຖານໜັກແໜ້ນກວ່າເກົ່າ, ການຮ່ວມມືທີ່ແທ້ຈິງລະຫວ່າງສອງປະເທດນັບມື້ນັບກວ້າງຂວາງກວ່າເກົ່າ, ການແລກປ່ຽນດ້ານວັດທະນະທຳລະຫວ່າງສອງປະເທດກໍນັບມື້ນັບແໜ້ນແຟ້ນກວ່າເກົ່າ.
ປີນີ້, ແມ່ນປີທີ່ຈີນຈະສ້າງສັງຄົມທີ່ອິ່ມໜຳສຳລານຢ່າງຮອບດ້ານໃຫ້ສຳເລັດ, ແລະແມ່ນປີທີ່ຈະຕ້ອງບັນລຸເປົ້າໝາຍສູ້ຊົນເຮັດໃຫ້ເຫດການສຳຄັນ 100 ປີອັນໜຶ່ງສຳເລັດຜົນ. ສອງຝ່າຍຄວນຖືການສ້າງຕັ້ງສາຍພົວພັນທາງການທູດຄົບຮອບ 70 ປີເປັນກາລະໂອກາດທີ່ດີ, ເສີມຂະຫຍາຍມິດຕະພາບອັນເປັນມູນເຊື້ອ, ລົງເລິກການຮ່ວມມືແບບຕ່າງຝ່າຍຕ່າງມີຜົນປະໂຫຍດ, ຊຸກຍູ້ໃຫ້ການພົວພັນລະຫວ່າງຈີນກັບມຽນມາກ້າວຂຶ້ນສູ່ລະດັບໃໝ່. ສອງຝ່າຍຄວນສືບຕໍ່ເພີ່ມທະວີການແລກປ່ຽນທາງຍຸດທະສາດ, ກຳນົດແຜນການໃໝ່ດ້ານການພົວພັນລະຫວ່າງສອງຝ່າຍ. ລົງເລິກການໄປມາຫາສູ່ກັນດ້ານເສດຖະກິດການຄ້າ, ເພີ່ມພະລັງຊຸກດັນໃໝ່ເຂົ້າໃນການຮ່ວມມືແບບຕ່າງຝ່າຍຕ່າງມີຜົນປະໂຫຍດ. ເພີ່ມທະວີການແລກປ່ຽນແລະຖອດຖອນບົດຮຽນເຊິ່ງກັນແລະກັນ, ເພີ່ມເນື້ອໃນໃໝ່ໃນການຮ່ວມມືຖານອ້າຍນ້ອງຈີນ-ມຽນມາ. ເພີ່ມທະວີການປະສານງານ, ສ້າງສະພາບການໃໝ່ທີ່ມີສັນຕິພາບແລະສະຖຽນລະພາບຂອງພາກພື້ນນີ້.
ຈີນແລະມຽນມາມີສຸພາສິດຄ້າຍຄືກັນວ່າ: “ຍາດຕິພີ່ນ້ອງໄປມາຫາສູ່ກັນຍິ່ງຫຼາຍຍິ່ງສະໜິດ, ເພື່ອນມິດໄປມາຫາສູ່ກັນເລື້ອຍໆຍິ່ງໃກ້ຊິດ”. ໂດຍຢືນຢູ່ຈຸດເລີ່ມຕົ້ນໃໝ່ຂອງປະຫວັດສາດເນື່ອງໃນໂອກາດສ້າງຕັ້ງສາຍພົວພັນທາງການທູດລະຫວ່າງສອງປະເທດຄົບຮອບ 70 ປີ, ຈີນຍິນດີສຸມຄວາມພະຍາຍາມຮ່ວມກັນກັບເພື່ອນມິດມຽນມາ, ຊຸກຍູ້ການສ້າງຄູ່ຮ່ວມຊາຕາກຳຈີນ-ມຽນມາໃຫ້ໃກ້ຊິດກວ່າເກົ່າ, ສືບຕໍ່ຂຽນບົດຄວາມໃໝ່ດ້ານມິດຕະພາບຖານອ້າຍນ້ອງຈີນ-ມຽນມາທີ່ມີມູນເຊື້ອຍາວນານພັນກວ່າປີ.
ຄຳເຫັນ
0