ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 16 ມັງກອນນີ້, CRI ໄດ້ອອກບົດວິເຄາະທີ່ພາດຫົວຂໍ້ວ່າ: “ຊຸກຍູ້ການສ້າງຄູ່ຮ່ວມຊາຕາກຳຈີນ-ມຽນມາໃຫ້ແໜ້ນແຟ້ນກວ່າເກົ່າ” ໂດຍລະບຸວ່າ, ວັນທີ 17 ມັງກອນນີ້, ທ່ານສີຈິ້ນຜິງ ປະທານປະເທດຈີນໄດ້ເດີນທາງຢ້ຽມຢາມມຽນມາທາງລັດຖະກິດເປັນເວລາ 2 ວັນ ເຊິ່ງເປັນການຢ້ຽມຢາມຕ່າງປະເທດເປັນຄັ້ງທຳອິດຂອງທ່ານໃນປີໃໝ່ນີ້ ແລະ ກໍແມ່ນທ່ານປະທານປະເທດຈີນຢ້ຽມຢາມມຽນມາອີກຄັ້ງໜຶ່ງໃນຮອບ 19 ປີ. ກ່ອນການຢ້ຽມຢາມ, ທ່ານສີຈິ້ນຜິງໄດ້ຂຽນບົດຄວາມລົງສື່ມວນຊົນສຳຄັນຫຼາຍແຫ່ງຂອງມຽນມາ ໂດຍໄດ້ຍ້ອງຍໍຊົມເຊີຍການພົວພັນຮ່ວມມືມິດຕະພາບລະຫວ່າງສອງປະເທດຈາກດ້ານຕ່າງໆ ເຊັ່ນ: ຄວາມໄວ້ເນື້ອເຊື່ອໃຈກັນທາງການເມືອງ, ການຮ່ວມມືຕົວຈິງ, ການແລກປ່ຽນດ້ານວັດທະນະທຳ ແລະ ອື່ນໆ ພ້ອມທັງຫວັງວ່າ, ຈະເປັນການຊຸກຍູ້ການສ້າງຄູ່ຮ່ວມຊາຕາກຳຈີນ-ມຽນມາໃຫ້ແໜ້ນແຟ້ນກວ່າເກົ່າ ແລະ ເປັນການຂຽນປະຫວັດສາດໜ້າໃໝ່ຂອງຄວາມຮັກແພງຖານອ້າຍນ້ອງຈີນ-ມຽນມາທີ່ມີປະຫວັດສາດມາເປັນພັນປີ ໂດຍຜ່ານຈາກການຢ້ຽມຢາມຄັ້ງນີ້.
ບົດຄວາມລະບຸຕື່ມວ່າ, ທ່ານສີຈິ້ນຜິງໄດ້ສະເໜີຂໍ້ລິເລີ່ມ 4 ຂໍ້ຕໍ່ການຂະຫຍາຍການພົວພັນຈີນ-ມຽນມາໃນຍຸກໃໝ່ໃນບົດຄວາມ ດັ່ງຕໍ່ໄປນີ້:
ໜຶ່ງ, ເພີ່ມທະວີການແລກປ່ຽນທາງຍຸດທະສາດ, ກຳນົດແຜນການໃໝ່ດ້ານການພົວພັນລະຫວ່າງສອງປະເທດ.
ສອງ, ລົງເລິກການໄປມາຫາສູ່ກັນດ້ານເສດຖະກິດການຄ້າ, ເພີ່ມພະລັງຊຸກດັນໃໝ່ເຂົ້າໃນການຮ່ວມມືແບບຕ່າງຝ່າຍຕ່າງມີຜົນປະໂຫຍດ.
ສາມ, ເພີ່ມທະວີການແລກປ່ຽນແລະຖອດຖອນບົດຮຽນເຊິ່ງກັນແລະກັນ, ເພີ່ມເນື້ອໃນໃໝ່ໃນການຮ່ວມມືຖານອ້າຍນ້ອງຈີນ-ມຽນມາ.
ສີ່, ເພີ່ມທະວີການປະສານງານ, ສາງສະພາບການໃໝ່ທີ່ມີສັນຕິພາບແລະສະຖຽນລະພາບໃຫ້ພາກພື້ນແຫ່ງນີ້.
ບົດຄວາມລະບຸວ່າ, ປີນີ້ແມ່ນປີທີ່ຈີນ-ມຽນມາສ້າງຕັ້ງສາຍພົວພັນທາງການທູດຄົບຮອບ 70 ປີ, ການຢ້ຽມຢາມຕ່າງປະເທດຄັ້ງທຳອິດຂອງຜູ້ນຳຈີນໃນປີໃໝ່ໄດ້ເລືອກໄປຢ້ຽມຢາມມຽນມາ, ສະແດງໃຫ້ເຫັນວ່າຈີນໃຫ້ຄວາມສຳຄັນຢ່າງສູງຕໍ່ການພົວພັນລະຫວ່າງຈີນກັບມຽນມາ. ເຊື່ອວ່າຄຽງຄູ່ກັບການຮ່ວມມືລະຫວ່າງສອງປະເທດໃນຂົງເຂດຕ່າງໆໄດ້ກ້າວເຂົ້າສູ່ລວງເລິກ, ການພົວພັນຈີນ-ມຽນມາໃນຍຸກໃໝ່ຈະສ້າງຄວາມຜາສຸກຫຼາຍກວ່າເກົ່າໃຫ້ແກ່ປະຊາຊົນທັງສອງປະເທດຢ່າງແນ່ນອນ, ແລະເພີ່ມພະລັງຊຸກດັນໃຫ້ແກ່ສັນຕິພາບແລະການພັດທະນາຂອງພາກພື້ນກໍຄືການສ້າງປະຊາຄົມຮ່ວມຊາຕາກຳມວນມະນຸດ.
ຄຳເຫັນ
0