ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 19 ມັງກອນນີ້, ໃນກອງປະຊຸມຖະແຫຼງຂ່າວທີ່ຈັດຂຶ້ນຢູ່ປັກກິ່ງ, ທ່ານເມີ້ງເຫວີຍ ໂຄສົກຄະນະກຳມະການປະຕິຮູບແລະການພັດທະນາແຫ່ງຊາດຈີນຊີ້ໃຫ້ເຫັນວ່າ, ປີ 2019, GDPສະເລ່ຍຕໍ່ຫົວຄົນຂອງຈີນບັນລຸຫຼາຍກວ່າ 10 ພັນໂດລາສະຫະລັດ, ເປັນຂີດໝາຍສະແດງໃຫ້ເຫັນວ່າ: ກຳລັງແຮງສັງລວມແຫ່ງຊາດຈີນສູງຂຶ້ນ, ກຳລັງການຜະລິດໃນສັງຄົມເພີ່ມຂຶ້ນ, ແລະລະດັບຊີວິດການເປັນຢູ່ຂອງປະຊາຊົນຖືກຍົກສູງຂຶ້ນ. ແລະເປັນຂີດໝາຍສະແດງໃຫ້ເຫັນວ່າ ຈີນໄດ້ຢ່ວງບາດກ້າວອັນໜັກແໜ້ນໄປສູ່ຖັນແຖວປະເທດທີ່ມີລາຍໄດ້ສູງ. ນີ້ແມ່ນຜົນສຳເລັດອັນຍິ່ງໃຫຍ່ຂອງຈີນໃນການຊຸກຍູ້ການສ້າງສັງຄົມທີ່ອີ່ມໜຳສຳລານຢ່າງຮອບດ້ານ. ໃນຂະນະດຽວກັນ, ທ່ານເມີ້ງເຫວີຍກໍ່ໄດ້ກ່າວວ່າ, GDPສະເລ່ຍຕໍ່ຫົວຄົນຂອງປະເທດທີ່ພັດທະນາແລ້ວແມ່ນຫຼາຍກວ່າ 30 ພັນໂດລາສະຫະລັດ, ຈີນຍັງແມ່ນປະເທດທີ່ພວມພັດທະນາທີ່ໃຫຍ່ກວ່າໝູ່ໃນໂລກ.
ທ່ານເມີ້ງເຫວີຍກ່າວຕື່ມວ່າ, ເມື່ອສັງເກດຈາກຕົວເລກໃນເດືອນທັນວາແລ້ວເຫັນວ່າ, ການເຄື່ອນໄຫວດ້ານເສດຖະກິດຂອງຈີນໃນປັດຈຸບັນໄດ້ປະກົດມີການປ່ຽນແປງຢ່າງຕັ້ງໜ້າ, ໃນດ້ານການຜະລິດ, ການບໍລິໂພກ, ການຄາດຄະເນ ແລະລາຄາເປັນຕົ້ນ ລ້ວນແຕ່ມີສະພາບດີຂຶ້ນ. ທ່ວງທ່າອັນຕັ້ງໜ້າເຫຼົ່ານີ້ແມ່ນໝາກຜົນຂອງນະໂຍບາຍຕ່າງໆ, ແລະໄດ້ຢືນຢັນຢ່າງເຕັມສ່ວນວ່າ ເສດຖະກິດຈີນມີແຮງຕ້ານທານຢ່າງເຂັ້ມແຂງ, ມີກຳລັງບົ່ມຊ້ອນອັນມະຫາສານ ແລະສາມາດຍືດຫົດໄດ້. ເຖິງວ່າສະພາບການແລະສະຖານະການພາຍໃນແລະຕ່າງປະເທດໃນປັດຈຸບັນນີ້ຈະສັບສົນເຄັ່ງຕຶງ, ມີປັດໃຈທີ່ບໍ່ແນ່ນອນອ່າວຫຼາຍກໍ່ຕາມ, ແຕ່ເມື່ອສັງເກດຈາກທ່າອ່ຽງການພັດທະນາໃນປີ 2020 ແລ້ວເຫັນວ່າ: ພື້ນຖານທີ່ເສດຖະກິດຈີນຈະຮັກສາທ່ວງທ່າທີ່ໝັ້ນທ່ຽງນັ້ນຍັງຄົງໜັກແໜ້ນ, ຍັງມີເງື່ອນໄຂທີ່ເອື້ອອຳນວຍຫຼາຍພໍສົມຄວນ.
ຄຳເຫັນ
0