ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ໃນຫຼາຍປີມໍ່ໆມານີ້, ລັດຖະບານອາເມຣິກາໄດ້ມີຂໍ້ຈຳກັດ ແລະ ໃຊ້ຄວາມກົດດັນແບບໄຮ້ເຫດຜົນຫຼາຍເທື່ອຕໍ່ການລາຍງານຂ່າວທີ່ເປັນປົກກະຕິຂອງສຳນັກງານແລະເຈົ້າໜ້າທີ່ສື່ມວນຊົນຈີນທີ່ປະຈຳຢູ່ອາເມຣິກາ, ໃນນັ້ນໄດ້ຍົກລະດັບການຈຳແນກແລະໂຈມຕີທາງການເມືອງຕໍ່ສື່ມວນຊົນຈີນເລື້ອຍໆ, ໂດຍສະເພາະແມ່ນໃນເດືອນທັນວາປີ 2018, ອາເມຣິກາໄດ້ຮຽກຮ້ອງໃຫ້ສຳນັກງານສື່ມວນຊົນຈີນປະຈຳອາເມຣິກາຕ້ອງໄດ້ລົງທະບຽນເປັນ “ຕົວແທນຕ່າງປະເທດ”, ເດືອນກຸມພາປີນີ້, ໄດ້ຈັດເອົາສຳນັກງານຜູ້ຕາງໜ້າສື່ມວນຊົນ 5 ແຫ່ງຂອງຈີນປະຈຳອາເມຣິກາເປັນ “ໜ່ວຍງານການທູດຕ່າງປະເທດ”, ຫຼັງຈາກນັ້ນ, ຍັງໄດ້ຈຳກັດຈຳນວນຄົນປະຈຳການຂອງ 5 ອົງການສື່ດັ່ງກ່າວທີ່ປະຈຳຢູ່ອາເມຣິກາ ແລະ ໄດ້ “ຂັບໄລ່” ນັກຂ່າວຈີນຈຳນວນຫຼາຍດ້ວຍຂໍ້ອ້າງດັ່ງກ່າວ. ຈີນໄດ້ສະແດງການປະທ້ວງຢ່າງເຄັ່ງຂຶມຕໍ່ການກະທຳແບບຜິດພາດຂອງອາເມຣິກາຢ່າງທັນການ ແລະ ໄດ້ສະແດງຄວາມຄັດຄ້ານຢ່າງເດັດດ່ຽວແລະກ່າວປະນາມຢ່າງຮຸນແຮງພ້ອມທັງກ່າວເນັ້ນວ່າ: ຈະປົກປ້ອງສິດຂອງຝ່າຍຕົນດ້ວຍການໃຊ້ມາດຕະການຕອບໂຕ້ຄືນ.
ຝ່າຍຈີນປະກາດວ່າ, ນັບແຕ່ມື້ນີ້ເປັນຕົ້ນໄປ:
ໜຶ່ງ, ໂດຍແນໃສ່ກໍລະນີທີ່ອາເມຣິກາຈັດເອົາສຳນັກງານຜູ້ຕາງໜ້າສື່ມວນຊົນ 5 ແຫ່ງຂອງຈີນເປັນ “ໜ່ວຍງານການທູດຕ່າງປະເທດ”, ຈີນຮຽກຮ້ອງໃຫ້ສຳນັກງານຜູ້ຕາງໜ້າສື່ມວນຊົນອາເມຣິກາ 5 ແຫ່ງຄື: “ສຽງອາເມຣິກາ” ຫຼື VOA, ໜັງສືພິມ “ນິວຢອກທາມສ”, “ວອນສະຕຣີດລາຍວັນ”, “ວໍຊິງຕັນໂພສ” ແລະ ວາລະສານ “ທາມສ” ແຈ້ງຈຳນວນພະນັກງານ, ການເງິນ, ສະພາບການເຮັດທຸລະກິດ ແລະ ສະພາບການດ້ານອະສັງຫາລິມະຊັບຢູ່ພາຍໃນປະເທດຈີນຕໍ່ຝ່າຍຈີນຢ່າງເທົ່າທຽມກັນ.
ສອງ, ໂດຍແນໃສ່ກໍລະນີທີ່ອາເມຣິກາຕັດຈຳນວນພະນັກງານ ຫລືໃນຄວາມເປັນຈິງກໍແມ່ນການຂັບໄລ່ພະນັກງານສື່ມວນຊົນຈີນປະຈຳອາເມຣິກາ, ຈີນຈຶ່ງໄດ້ຮຽກຮ້ອງໃຫ້ນັກຂ່າວສັນຊາດອາເມຣິກາຂອງໜັງສືພິມ “ນິວຢອກທາມສ”, “ວອນສະຕຣິດລາຍວັນ” ແລະ “ວໍຊິງຕັນໂພສ” ທີ່ມີບັດນັກຂ່າວໝົດອາຍຸໃນທ້າຍປີນີ້ຕ້ອງເຂົ້າລາຍງານບັນຊີລາຍຊື່ຕໍ່ກົມການຂ່າວກະຊວງການຕ່າງປະເທດຈີນພາຍໃນກຳນົດເວລາ 4 ວັນນັບແຕ່ມື້ນີ້ເປັນຕົ້ນໄປ ແລະ ຕອ້ງມອບບັດນັກຂ່າວໃຫ້ຝ່າຍຈີນພາຍໃນ 10 ວັນ, ນັບແຕ່ມື້ນີ້ເປັນຕົ້ນໄປ, ຈະບໍ່ສາມາດດຳເນີນວຽກງານຂອງນັກຂ່າວຢູ່ ສປ ຈີນ ເຊິ່ງລວມທັງເຂດບໍລິຫານພິເສດຮົງກົງ ແລະມາເກົາ.
ສາມ, ໂດຍແນໃສ່ກໍລະນີທີ່ອາເມຣິກາໃຊ້ມາດຕະການຈຳແນກແລະຈຳກັດຕໍ່ນັກຂ່າວຈີນໃນດ້ານການໃຫ້ວີຊາ, ການກວດກາດ້ານບໍລິຫານ, ການເກັບກຳຂ່າວ ແລະອື່ນໆ, ຈີນຈະໃຊ້ມາດຕະການທີ່ສົມຄູ່ກັນຕໍ່ນັກຂ່າວອາເມຣິກາເຊັ່ນກັນ.
ຈີນໃຊ້ມາດຕະການດັ່ງກ່າວແມ່ນດຳເນີນການຕອບໂຕ້ຄືນທີ່ຈຳເປັນຕໍ່ການກະທຳຂອງອາເມຣິກາທີ່ໂຈມຕີສຳນັກງານຜູ້ຕາງໜ້າສື່ມວນຊົນຈີນປະຈຳອາເມຣິກາແບບໄຮ້ເຫດຜົນ, ເປັນການປ້ອງກັນຕົວທີ່ເປັນທຳແລະສົມເຫດສົມຜົນ. ການກະທຳຂອງອາເມຣິກາທີ່ມີຕໍ່ສື່ມວນຊົນຈີນແມ່ນສືບທອດມາຈາກແນວຄິດສົງຄາມເຢັນແລະຄວາມລຳອຽງໃນດ້ານຮູບຖານຈິດສຳນຶກ, ເປັນການທຳລາຍຊື່ສຽງແລະພາບພົດຂອງສື່ມວນຊົນຈີນຢ່າງໜັກໜ່ວງ, ໄດ້ສ້າງຜົນປະທົບອັນຮ້າຍແຮງຕໍ່ວຽກງານປະຈຳວັນຂອງສື່ມວນຊົນຈີນຢູ່ອາເມຣິກາ ແລະ ໄດ້ລົບກວນການແລກປ່ຽນດ້ານວັດທະນະທຳທີ່ເປັນປົກກະຕິລະຫວ່າງສອງປະເທດຢ່າງຮ້າຍແຮງ ເຊິ່ງໄດ້ສະແດງໃຫ້ເຫັນເຖິງຄວາມຈອມປອມທີ່ວ່າ “ເສລີພາບດ້ານການລາຍງານຂ່າວ” ຂອງອາເມຣິກາ. ຈີນທວງໃຫ້ອາເມຣິກາຈົ່ງດັດແກ້ຄວາມຜິດພາດຂອງຕົນ, ຢຸດຕິການໂຈມຕີທາງການເມືອງແລະຈຳກັດຕໍ່ສື່ມວນຊົນຈີນ. ຖ້າອາເມຣິກາຕັ້ງໃຈສືບຕໍ່ພຶດຕິກຳທີ່ຜິດພາດຕໍ່ໄປ, ຜິດແລ້ວຜິດອີກ, ຈີນກໍຍ່ອມຈະໃຊ້ມາດຕະການຕອບໂຕ້ຄືນຕື່ມອີກເຊັ່ນກັນ.
ນະໂຍບາຍພື້ນຖານຂອງຈີນໃນການຍຶດໝັ້ນການເປີດປະຕູສູ່ພາຍນອກບໍ່ປ່ຽນແປງ ແລະ ກໍຈະບໍ່ມີວັນປ່ຽນແປງ, ຈີນຍິນດີຕ້ອນຮັບສື່ມວນຊົນ ແລະນັກຂ່າວ ປະເທດຕ່າງໆເຂົ້າມາລາຍງານຂ່າວຢູ່ຈີນ ຕາມກົດໝາຍ ແລະ ກົດລະບຽບຂອງຈີນ, ສິ່ງທີ່ຈີນຄັດຄ້ານນັ້ນແມ່ນການສວຍໃຊ້ເສລີພາບດ້ານການລາຍງານຂ່າວເພື່ອສ້າງຂ່າວປອມ, ຄັດຄ້ານການກະທຳທີ່ລະເມີດຈັນຍາບັນຂອງການລາຍງານຂ່າວ. ຫວັງວ່າ, ສື່ມວນຊົນແລະນັກຂ່າວຕ່າງປະເທດຈະເສີມຂະຫຍາຍບົດບາດອັນຕັ້ງໜ້າ ໃນການຊຸກຍູ້ໃຫ້ຈີນແລະໂລກເພີ່ມຄວາມເຂົ້າໃຈເຊິ່ງກັນ ແລະ ກັນ.
ຄຳເຫັນ
0