ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ແນໃສ່ກໍລະນີທີ່ນັກການເມືອງອາເມຣິກາລະແວງສົງໃສຕໍ່ການເປີດເຜີຍຂໍ້ມູນຂ່າວສານກ່ຽວກັບພະຍາດໂຄວິດ-19 ຂອງຈີນ, ທ່ານຈ້າວລີ້ຈ່ຽນ ໂຄສົກກະຊວງການຕ່າງປະເທດຈີນໄດ້ຢືນຢັນໃນກອງປະຊຸມຖະແຫຼງຂ່າວທີ່ຈັດຂຶ້ນຢູ່ນະຄອນຫຼວງປັກກິ່ງໃນວັນທີ 6 ກໍລະກົດນີ້ວ່າ: ນັກການເມືອງບາງຄົນຂອງອາເມຣິກາບິດເບືອນຄວາມເປັນຈິງ, ເສກສັນປັ້ນແຕ່ງຄຳຫຼອກລວງ, ມີຈຸດປະສົງ ເພື່ອໃສ່ຮ້າຍປ້າຍສີຈີນແລະອົງການອະນາໄມໂລກກໍຄືເພື່ອຮັບໃຊ້ຈຸດປະສົງທາງການເມືອງຂອງຕົນ. ຈີນເລັ່ງທວງໃຫ້ເຂົາເຈົ້າເຄົາລົບຄວາມເປັນຈິງ, ຢຸດຕິການຫຼິ້ນເລ່ຫຼ່ຽມທາງ ການເມືອງ.
ຫວ່າງກ່ອນນີ້ບໍ່ດົນ, ອົງການອະນາໄມໂລກໄດ້ປັບປຸງ “ຕາຕະລາງເວລາຮັບມືກັບການແຜ່ລະບາດຂອງພະຍາດໂຄວິດ-19”ໃຫ້ທັນສະພາບການ. ທ່ານໄມເຄີນ ແມັກຄາວ ປະທານວຽກງານກ່ຽວກັບປະເທດຈີນຂອງສະພາຕ່ຳອາເມຣິກາໄດ້ອອກຖະແຫຼງການໂດຍສະແດງຄວາມລະແວງສົງໃສຕໍ່ ຄວາມໂປ່ງໃສແລະທັນເວລາຂອງການປະກາດສະພາບການແຜ່ລະບາດຂອງພະຍາດໂຄວິດ-19 ຢູ່ຈີນ. ໃນເວລາຕອບຄຳຖາມທີ່ກ່ຽວຂ້ອງຂອງນັກຂ່າວ, ທ່ານຈ້າວລີ້ຈ່ຽນກ່າວວ່າ:
“ຖ້ອຍຄຳຂອງຝ່າຍອາເມຣິກາແມ່ນບໍ່ຖືກຕ້ອງກັບຄວາມເປັນຈິງແຕ່ປະການໃດ. ໃນຖານະເປັນປະເທດພາຄີກົດລະບຽບກ່ຽວກັບອະນາໄມສາກົນຂອງອົງການອະນາໄມໂລກ, ຈີນໄດ້ປະຕິບັດຕາມໜ້າທີ່ແລະພັນທະຕາມທີ່ກຳນົດໄວ້ໃນກົດລະບຽບກ່ຽວກັບອະນາໄມສາກົນຢ່າງຕັ້ງໜ້າຕາມທ່າທີທີ່ເປີດເຜີຍ, ໂປ່ງໃສແລະມີຄວາມຮັບຜິດຊອບຢ່າງສະເໝີຕົ້ນສະເໝີປາຍ, ຈີນໄດ້ເປັນເຈົ້າການແຈ້ງຂໍ້ມູນຂ່າວສານກ່ຽວກັບພະຍາດໂຄວິດ- 19 ໃຫ້ອົງການອະນາໄມໂລກ, ປະເທດແລະເຂດແຄວ້ນທີ່ກ່ຽວຂ້ອງ ກໍຄື ເຂດຮົງກົງ,ມາກາວແລະໄຕ້ຫວັນຂອງຈີນຢ່າງທັນເວລາ.ຕາຕະລາງເວລາທີ່ລັດຖະບານຈີນແລະອົງການອະນາໄມໂລກເປີດເຜີຍນັ້ນລ້ວນແຕ່ໄດ້ສະແດງໃຫ້ເຫັນຢ່າງຈະແຈ້ງວ່າ: ຈີນໄດ້ແບ່ງປັນຂໍ້ມູນຂ່າວສານກ່ຽວກັບພະຍາດໂຄວິດ-19ໃຫ້ປະຊາຄົມໂລກຢ່າງໂປ່ງໃສ. ວັນທີ 31 ທັນວາປີ 2019ຜ່ານມາ, ເວັບໄຊທາງການຂອງຄະນະກຳມະການສາທາລະນະສຸກນະຄອນອູຮັ້ນຈີນກໍໄດ້ເປີດເຜີຍ ແຈ້ງການວ່າດ້ວຍສະພາບພະຍາດໂຄວິດ- 19ຢູ່ອູຮັ້ນ, ຈີນໄດ້ແຈ້ງສະພາບທີ່ກ່ຽວຂ້ອງໃຫ້ອົງການອະນາໄມໂລກຮັບຮູ້ຢ່າງວ່ອງໄວແລະທັນເວລາທີ່ສຸດ ເຊິ່ງເປັນຄວາມເປັນຈິງອັນຈະແຈ້ງທີ່ສຸດ. ”
ຄຳເຫັນ
0