ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ຕາມຂ່າວCRI:ວັນທີ 3 ສິງຫານີ້, ທ່ານຢານ ເສີງ ສີ, ໂຄສົກທັງເປັນຫົວໜ້າຫ້ອງການຄຸ້ມຄອງລະບົບນຳທາງດ້ວຍດາວທຽມເປີຍໂຕຈີນ, ໄດ້ກ່າວໃນພິທີຖະແຫຼງຂ່າວທີ່ໄດ້ຈັດຂຶ້ນຢູ່ນະຄອນຫຼວງປັກກິ່ງວ່າ: ຊິບລະບົບນຳທາງດ້ວຍດາວທຽມເປີຍໂຕຂະໜາດ 28 ນາໂນແມັດໄດ້ຮັບການຜະລິດຢ່າງເປັນທາງການ, ຊິບຂະໜາດ 22 ນາໂນແມັດກໍຈະໄດ້ຮັບການຜະລິດເປັນຈຳນວນຫຼາຍໃນໄວໆນີ້.
ທ່ານຢານ ເສີງ ສີກ່າວວ່າ, ຊິບຂະໜາດ 22 ນາໂນແມັດຈະໄດ້ຮັບການຜະລິດຈຳນວນຫຼາຍໃນໄວໆນີ້, ເຊິ່ງໄດ້ບຸທະລຸລະດັບສູງທີ່ສຸດຂອງຊິບນຳທາງດ້ວຍດາວທຽມຂອງໂລກ. ປັດຈຸບັນນີ້, ມືຖືສະມາດໂຟນສ່ວນຫຼາຍໄດ້ນຳໃຊ້ລະບົບນຳທາງດ້ວຍດາວທຽມເປີຍໂຕ. ຂະແໜງການນຳທາງດ້ວຍດາວທຽມຈີນແລະການບໍລິການກຳນົດທີ່ຕັ້ງໄດ້ສ້າງມູນຄ່າເຖິງ 345 ຕື້ຢວນໃນປີ 2019, ໃນປີ 2020 ອາດຈະບັນລຸຫຼາຍກວ່າ 400 ຕື້ຢວນ.
ທ່ານຢານ ເສີງ ສີຍັງເປີດເຜີຍວ່າ, ຈີນມີໜ່ວຍງານທີ່ກ່ຽວຂ້ອງ 400 ກວ່າແຫ່ງ, ພະນັກງານວິທະຍາສາດເຕັກໂນໂລຊີ 3 ແສນກວ່າຄົນໄດ້ເຂົ້າຮ່ວມການພັດທະນາລະບົບນຳທາງດ້ວຍດາວທຽມທົ່ວໂລກເປີຍໂຕ. ພະນັກງານຄົ້ນຄວ້າວິທະຍາສາດຈີນໄດ້ສູ້ຊົນຜ່ານຜ່າແລະສາມາດບັນລຸການບຸກທະລຸໃນດ້ານເຕັກໂນໂລຊີສຳຄັນ 160 ກວ່າໂຄງການ, ໄດ້ບັນລຸການຄົ້ນຄວ້າແລະຜະລິດອາໄລ່ຊັ້ນສ່ວນ 500 ກວ່າປະເພດດ້ວຍຕົນເອງ, ບັນລຸເປົ້າມໝາຍທີ່ຈີນສາມາດຜະລິດຊັ້ນສ່ວນອາໄລ່ສຳຄັນຂອງດາວທຽມເປີຍໂຕ 3 ໄດ້ເອງ 100%.
ຄຳເຫັນ
0