ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ໃນຖານະເປັນແອັບວິດີໂອສັ້ນທີ່ມີຫົວຄິດປະດິດສ້າງ, TikTok ໄດ້ຮັບຄວາມນິຍົມຊົມຊອບຈາກຄົນທັງຫຼາຍ ແລະ ມີຜູ້ເບິ່ງເຂົ້າຊົມຫຼາຍກວ່າຮ້ອຍລ້ານຄົນຢູ່ອາເມຣິກາ. ແຕ່ວ່າ, ນັບແຕ່ເດືອນກໍລະກົດປີນີ້ເປັນຕົ້ນມາ, TikTok ຖືກລັດຖະບານອາເມຣິກາ “ຂວ້ຳບາດ”: ລັດຖະບານອາເມຣິກາບັງຄັບໃຫ້ບໍລິສັດ ByteDance ຂາຍທຸລະກິດ TikTok ຢູ່ອາເມຣິກາໃຫ້ບໍລິສັດອາເມຣິກາດ້ວຍລາຄາຖືກ ດ້ວຍຂໍ້ອ້າງ “ຄວາມໝັ້ນຄົງແຫ່ງຊາດ”.
ເພື່ອຮັບມືກັບຂໍ້ຮຽກຮ້ອງທີ່ໄຮ້ເຫດຜົນຂອງລັດຖະບານອາເມຣິກາ, ວັນທີ 19 ກັນຍານີ້, ບໍລິສັດ ByteDance ໄດ້ສະເໜີອອກມາວ່າ: ຈະຮ່ວມມືກັບບໍລິສັດ ໂອຣັກໂກ ແລະ ບໍລິສັດວອນມາດຂອງອາເມຣິກາ ເຊິ່ງໄດ້ບັນລຸແຜນການແກ້ໄຂທີ່ສອດຄ່ອງກັບກົດໝາຍຈີນ ແລະ ອາເມຣິກາ. ມື້ດຽວກັນ, ຢູ່ນະຄອນຫຼວງວໍຊິງຕັນ, ທ່ານໂດໂນ ທຣຳ ປະທານທິບໍດີອາເມຣິກາກ່າວວ່າ: ໄດ້ເຫັນດີ “ໃນດ້ານຫຼັກການ” ຕໍ່ແຜນການດັ່ງກ່າວ. ແຕ່ວ່່າ: ຍ້ອນວ່າແຜນການດັ່ງກ່າວບໍ່ໄດ້ຕອບສະໜອງຕໍ່ຈຸດປະສົງຂອງລັດຖະບານອາເມຣິກາທີ່ຢາກກືນກິນບໍລິສັດ TikTok, ວັນທີ 20 ກັນຍານີ້, ທ່ານໂດໂນ ທຣຳໄດ້ກ່າວອີກວ່າ: ລັດຖະບານອາເມຣິກາຈະບໍ່ອະນຸມັດແຜນການຮ່ວມມືດັ່ງກ່າວ ແລະ ໃນຂະນະດຽວກັນ, ກໍຮຽກຮ້ອງໃຫ້ເກືອດຫ້າມລຶບລ້າງ TikTok ອອກຈາກແອັບສະຕໍ ເຊິ່ງຈະມີຜົນບັງຄັບໃຊ້ໃນທັນທີ.
ການດຳເນີນທຸລະກິດຂອງບໍລິສັດ TikTok ບໍ່ມີຄວາມຜິດພາດຫຍັງ, ມີແຕ່ຍ້ອນວ່າທາງບໍລິສັດດັ່ງກ່າວໄດ້ເຮັດທຸລະກິດຕາມຫຼັກການ “ຕະຫຼາດເສລີ” ຂອງອາເມຣິກາ ແລະ ໄດ້ຮັບຄວາມນິຍົມຊົມຊອບຈາກຜູ້ຊົມ ເຊິ່ງມີມູນຄ່າທາງການຄ້າທີ່ໃຫຍ່ຫຼວງ, ຈິ່ງເຮັດໃຫ້ລັດຖະບານອາເມຣິກາຕັດສິນໃຈ “ຂວ້ຳບາດ” ບໍລິສັດດັ່ງກ່າວຊ້ຳແລ້ວຊ້ຳອີກ. ລັດຖະບານອາເມຣິກາໃຊ້ສິດອຳນາດຂອງລັດ “ຂວ້ຳບາດ” ບໍລິສັດແຫ່ງໜຶ່ງ, ໃຊ້ຄວາມກົດດັນທີ່ບໍ່ເປັນທຳເພື່ອບີບບັງຄັບບໍລິສັດ ByteDance, ນີ້ເປັນການກະທຳແບບຄົນເຖື່ອນຢ່າງໂຈ່ງແຈ້ງ.
ອາເມຣິກາມັກປ່າວປະກາດວ່າຕົນເອງເປັນຕະຫຼາດເສດຖະກິດເສລີ ແລະ ມີການແຂ່ງຂັນຢ່າງຍຸດຕິທຳມາໂດຍຕະຫຼອດ, ແຕ່ໃນເຫດການບໍລິສັດ ByteDanceເທື່ອນີ້, ລັດຖະບານອາເມຣິກາພັດໄດ້ຫັນບັນຫາການຄ້າເປັນບັນຫາການເມືອງ, ໄດ້ປະຖິ້ມຄວາມໜ້າເຊື່ອຖືຂອງລັດຖະບານ ແລະ ການແຂ່ງຂັນແບບຍຸດຕິທຳໃນຕະຫຼາດ, ເຮັດໃຫ້ປະເທດຕ່າງໆໃນໂລກລ້ວນແຕ່ໄດ້ເຫັນພາບພົດອັບອາຍຂອງລັດຖະບານອາເມຣິກາຢ່າງຈະແຈ້ງ. ລັດທິເຈົ້າອຳນາດຝືນກັບກະແສຂອງຍຸກສະໄໝ, ໃນຖານະເປັນຜູ້ສົ່ງເສີມການຄ້າຫຼາຍຝ່າຍ ແລະ ການຄ້າເສລີໃນອະດີດ, ອາເມຣິກາພວມເດີນຕາມເສັ້ນທາງຝືນກັບກະແສຂອງຍຸກສະໄໝ ແລະ ຈະຖືກກະແສຂອງຍຸກສະໄໝປະຖິ້ມໃຫ້ໂດດດ່ຽວໃນທີ່ສຸດ.
ຄຳເຫັນ
0