ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ອົງການອະນາໄມໂລກ ຫຼື WHO ໄດ້ປະກາດໃນວັນທີ 13 ມັງກອນນີ້ວ່າ: ທີມນັກວິທະຍາສາດສາກົນທີ່ປະກອບດ້ວຍຜູ້ຊ່ຽວຊານທີ່ດີເດັ່ນຈາກ 10 ປະເທດ ແລະອົງການຈັດຕັ້ງສາກົນ ໄດ້ເດີນທາງມາເຖິງຈີນແລ້ວ, ແລະເລີ່ມແຕ່ວັນທີ 14 ມັງກອນນີ້ເປັນຕົ້ນໄປ, ພວກເຂົາເຈົ້າຈະຮ່ວມກັນກັບເພື່ອນຮ່ວມງານຂອງຈີນ ເຂົ້າຮ່ວມການຄົ້ນຄວ້າວິທະຍາສາດກ່ຽວກັບແຫຼ່ງພະຍາດໂຄວິດ-19.
ທ່ານນາງແຮຣິສ ໂຄສົກອົງການອະນາໄມໂລກ ກ່າວວ່າ: ບັນດາຜູ້ຊ່ຽວຊານຈະຄົ້ນຄວ້າເພື່ອຊອກຮູ້ເລື່ອງຕ່າງໆ ເຊັ່ນ: ຜູ້ຕິດເຊື້ອພະຍາດໂຄວິດ-19 ທີ່ນະຄອນອູຮັ້ນໄດ້ປະກາດ ເປັນກໍລະນີທຳອິດ, ຊ່ອງທາງແຜ່ລະບາດທີ່ອາດເປັນໄປໄດ້, ການຄົ້ນຄວ້າສັດຕ່າງໆທີ່ອາດມີສ່ວນກ່ຽວຂ້ອງກັບການແຜ່ລະບາດຂອງພະຍາດ ແລະອື່ນໆ. ໃນໄລຍະເຮັດວຽກຢູ່ຈີນ, ທີມຄົ້ນຄວ້າດັ່ງກ່າວຍັງນຳໃຊ້ວິທີການຄົ້ນຄວ້າຕ່າງໆ ເພື່ອຄົ້ນຄວ້າຫາແຫຼ່ງພະຍາດ. ທ່ານນາງ ດຣ. ແຮຣິສ ຍັງກ່າວເນັ້ນໜັກວ່າ: ບໍ່ຄວນຈິນຕະນາການວ່າ ການຄົ້ນຄວ້າຂອງໜ່ວຍຊ່ຽວຊານເທື່ອນີ້ ຈະສາມາດໃຫ້ຄຳຕອບທີ່ຖືກຕ້ອງຕໍ່ບັນຫາທີ່ກ່ຽວຂ້ອງໄດ້ ເພາະວ່າການຄົ້ນຄວ້າສະພາບການແຜ່ລະບາດຂອງພະຍາດທີ່ຮ້າຍແຮງແລະໜັກໜ່ວງນັ້ນ ຕ້ອງການເວລາຢ່າງພຽງພໍ. ໂຄສົກທ່ານນີ້ຍັງກ່າວຢ່າງຈະແຈ້ງຕື່ມອີກວ່າ: ການເດີນທາງໄປຈີນເພື່ອດຳເນີນການຄົ້ນຄວ້າທີ່ກ່ຽວຂ້ອງເທື່ອນີ້ ບໍ່ໄດ້ກ່ຽວຂ້ອງກັບການເມືອງແຕ່ຢ່າງໃດ.
ຄຳເຫັນ
0