ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 18 ຫາວັນທີ 26 ມັງກອນນີ້, ກອງປະຊຸມຄະນະກຳມະການບໍລິຫານງານຂອງອົງການອະນາໄມໂລກຫຼື WHO ຄັ້ງທີ 148 ໄດ້ຈັດຂຶ້ນຜ່ານທາງວີດີໂອ ໂດຍໄດ້ປຶກສາຫາລືວະລະປະຊຸມຂອງກອງປະຊຸມອະນາໄມໂລກໃນປີນີ້ ແລະຮັບຮອງມະຕິທີ່ຈະຍື່ນຕໍ່ກອງປະຊຸມໃຫຍ່. ທ່ານເທໂຕຼສ ຜູ້ອຳນວຍການໃຫຍ່ອົງການອະນາໄມໂລກໄດ້ກ່າວໃນຄຳປາໄສໃນມື້ດຽວກັນວ່າ: ພາຍໃນໜຶ່ງປີຫຼັງເກີດມີເຊື້ອໄວຣັດພະຍາດໂຄວິດ-19 ຫຼາຍປະເທດໄດ້ປະສົບຜົນສຳເລັດໃນການຄົ້ນຄວ້າແລະຜະລິດວັກຊິນທີ່ມີຄວາມປອດໄພແລະມີປະສິດທິຜົນ, ນີ້ແມ່ນຜົນສຳເລັດດ້ານວິທະຍາສາດທີ່ດີເລີດ ທັງແມ່ນແຫຼ່ງກຳເນີດຂອງຄວາມຫວັງ. ເຊື້ອໄວຣັດສາຍພັນໃໝ່ທີ່ແຜ່ລະບາດຢ່າງວ່ອງໄວໃນຫວ່າງມໍ່ໆມານີ້ທີ່ເຮັດໃຫ້ການສັກວັກຊິນກາຍເປັນເລື່ອງສຳຄັນຫຼາຍ, ແຕ່ຄວາມອັນຕະລາຍທີ່ແທ້ຈິງຄື ຄວາມບໍ່ສະເໝີພາບກັນໃນການສັກວັກຊິນ.
ທ່ານເທໂຕຼສ ກ່າວເນັ້ນວ່າ: ໃນອະນາຄົນຈະມີວັກຊິນຕ້ານພະຍາດໂຄວິດ-19 ຢ່າງພຽງພໍ, ແຕ່ປັດຈຸບັນຕ້ອງສາມັກຄີກັນ, ໃຫ້ບູລິມະສິດແກ່ກຸ່ມຄົນທີ່ມີຄວາມສ່ຽງສູງຂອງທຸກປະເທດໃນການສັກວັກຊິນ. ວິທີທີ່ໃຫ້ບູລິມະສິດພຽງແຕ່ຕົນເອງຈະເຮັດໃຫ້ກຸ່ມຄົນທີ່ທຸກຍາກທີ່ສຸດແລະອ່ອນເອທີ່ສຸດໃນໂລກຕົກເຂົ້າສູ່ຄວາມອັນຕະລາຍ, ຈະເປັນການແກ່ຍາຍເວລາຂອງການແຜ່ລະບາດຂອງພະຍາດ ແລະການປະຕິບັດມາດຕະການຈຳກັດອອກໄປອີກ ເຊິ່ງຈະເຮັດໃຫ້ມວນມະນຸດແລະເສດຖະກິດໄດ້ຮັບຜົນກະທົບຫຼາຍກວ່າເກົ່າ. ດັ່ງນັ້ນ, ທ່ານເທໂຕຼສ ຈິ່ງຮຽກຮ້ອງໃຫ້ປະເທດຕ່າງໆຈົ່ງສາມັກຄີ ແລະປະສານສົມທົບກັນຕື່ມອີກ.
ຄຳເຫັນ
0