ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ພະຍາດໂຄວິດ-19 ໄດ້ແຜ່ລະບາດໃນຂອບເຂດທົ່ວໂລກ, ສົ່ງຜົນເຮັດໃຫ້ການແລກປ່ຽນແລະຮ່ວມມືສາກົນປະສົບຄວາມຫຍຸ້ງຍາກຢ່າງໜັກໜ່ວງ, ແຕ່ວ່າການແຜ່ລະບາດຂອງພະຍາດໂຄວິດ-19 ພັດບໍ່ສາມາດສະກັດກັ້ນບາດການກ້າວແລກປ່ຽນລະຫວ່າງຈີນກັບອາຊຽນໄດ້. ວັນທີ 11 ຫາວັນທີ 16 ມັງກອນນີ້, ທ່ານຫວາງຢີ້, ທີ່ປຶກສາແຫ່ງລັດທັງເປັນລັດຖະມົນຕີກະຊວງການຕ່າງປະເທດຈີນໄດ້ເດີນທາງໄປຢ້ຽມຢາມສີ່ປະເທດອາຊຽນຄື: ມຽນມາ, ອິນໂດເນເຊຍ, ບຣູໄນແລະຟີລິບປີນ. ເມື່ອເດືອນຕຸລາປີ 2020, ທ່ານຫວາງຢີ້ກໍເຄີຍໄປຢ້ຽມຢາມກຳປູເຈຍ, ມາເລເຊຍ, ລາວ, ໄທແລະໄດ້ແວ່ໄປຢ້ຽມຢາມສິງກະໂປ, ນອກຈາກນັ້ນ, ທ່ານຫວາງຢີ້ຍັງໄດ້ຕ້ອນຮັບການຢ້ຽມຢາມຂອງລັດຖະມົນຕີກະຊວງການຕ່າງປະເທດຫວຽດນາມຢູ່ຈີນ. ສະນັ້ນຈຶ່ງສາມາດເວົ້າໄດ້ວ່າ: ໃນໄລຍະທີ່ການແຜ່ລະບາດຂອງພະຍາດໂຄວິດ-19 ພວມເຂົ້າສູ່ສະພາບປົກກະຕິ, ຈີນໄດ້ມີການແລກປ່ຽນທາງການທູດກັບ 10 ປະເທດອາຊຽນຢ່າງຄົບຖ້ວນ, ນີ້ສະແດງໃຫ້ເຫັນເຖິງຄວາມສຳຄັນຂອງປະເທດອາຊີຕາເວັນອອກສຽງໃຕ້ທີ່ມີຕໍ່ການພົວພັນທາງການທູດໃນຖານະເປັນປະເທດອ້ອມຂ້າງຈີນ.
ປັດຈຸບັນ, ພະຍາດໂຄວິດ-19 ໄດ້ແຜ່ລະບາດໃນທົ່ວໂລກຢ່າງໜັກໜ່ວງທີ່ສຸດ, ວັກຊີນໄດ້ກາຍເປັນເຄື່ອງມືສຳຄັນຂອງປະເທດຕ່າງໆໃນດ້ານການປ້ອງກັນແລະຄວບຄຸມການແຜ່ລະບາດຂອງພະຍາດໂຄວິດ-19. ຈີນໄດ້ລິເລີ່ມດຳເນີນການຮ່ວມມືສາກົນເພື່ອຕ້ານກັບການແຜ່ລະບາດຂອງພະຍາດໂຄວິດ-19 ຢ່າງຕັ້ງໜ້າໃນໄລຍະທີ່ພະຍາດໂຄວິດ-19 ຫາກໍ່ແຜ່ລະບາດ, ແລະໄດ້ນຳໜ້າໝູ່ໃຫ້ຄຳໝັ້ນສັນຍາວ່າຈະຖືເອົາວັກຊີນຂອງຈີນເປັນຜະລິດຕະພັນສາທາລະນະຂອງໂລກ, ສຸມທຸກຄວາມພະຍາຍາມເພື່ອຊ່ວຍເຫຼືອປະເທດພວມພັດທະນາໃຫ້ສາມາດຈັດຊື້ແລະນຳໃຊ້ວັກຊີນພະຍາດໂຄວິດ-19 ໄດ້. ວັກຊີນທີ່ຈີນຜະລິດນັ້ນເປັນທີ່ຍອມຮັບໃນລະດັບສູງ ຈາກປະເທດອາຊີຕາເວັນອອກສຽງໃຕ້. ໃນໄລຍະທີ່ທ່ານຫວາງຢີ້ຢ້ຽມຢາມປະເທດອິນໂດເນເຊຍ, ທ່ານໂຈໂກ ວິໂດໂດ, ປະທານາທິບໍດີອິນໂດເນເຊຍກໍໄດ້ສັກວັກຊີນພະຍາດໂຄວິດ-19 ທີ່ຈີນຄົ້ນຄວ້າຜະລິດ, ນີ້ໄດ້ເປັນແບບຢ່າງທີ່ດີໃຫ້ແກ່ການຮ່ວມມືຕ້ານກັບການແຜ່ລະບາດຂອງພະຍາດໂຄວິດ-19 ລະຫວ່າງຈີນ-ອາຊຽນ. ທ່ານຫວາງຢີ້ມີຄວາມເຫັນວ່າ: ຈີນຍິນດີຮ່ວມມືກັບອິນໂດເນເຊຍ, ຈະໃຫ້ການສະໜັບສະໜູນອິນໂດເນເຊຍເປັນຖານການຜະລິດວັກຊີນຢູ່ພາກພື້ນແຫ່ງນີ້ບົນພື້ນຖານວັກຊີນພະຍາດໂຄວິດ-19 ທາງຄລິນິກໄລຍະ 3 ໃຫ້ສຳເລັດຜົນຢູ່ອິນໂດເນເຊຍ. ນອກຈາກນັ້ນ, ຈີນຍັງໄດ້ໃຫ້ການຊ່ວຍເຫຼືອດ້ານວັກຊີນແກ່ມຽນມາແລະຟີລິບປີນ.
ເຖິງວ່າການແຜ່ລະບາດຂອງພະຍາດໂຄວິດ-19 ໄດ້ສ້າງຜົນກະທົບຢ່າງໜັກໜ່ວງຕໍ່ເສດຖະກິດໂລກກໍຕາມ, ແຕ່ການຮ່ວມມື “ໜຶ່ງແລວໜຶ່ງເສັ້ນທາງ” ລະຫວ່າງຈີນກັບອາຊຽນກໍໄດ້ພັດທະນາກ້າວໄປໜ້າ, ແລະໄດ້ຮັບຄວາມຄືບໜ້າໃໝ່ຢ່າງບໍ່ຢຸດຢັ້ງ, ນີ້ໄດ້ສະແດງໃຫ້ເຫັນເຖິງຄວາມເຂັ້ມແຂງທີ່ສຸດ. ຢູ່ມຽນມາ, ຈີນແລະມຽນມາເຫັນດີໃຫ້ເລັ່ງລັດການຈັດຕັ້ງປະຕິບັດໂຄງການຮ່ວມມືແລວເສດຖະກິດຈີນ-ມຽນມາໂດຍໄວ, ເຮັດໃຫ້ແລວເສດຖະກິດຈີນ-ມຽນມາໃນຖານະເປັນໂຄງການຮ່ວມມືຕົ້ນຕໍຂອງການຮ່ວມມື “ໜຶ່ງແລວໜຶ່ງເສັ້ນທາງ” ລະຫວ່າງສອງຝ່າຍສາມາດຊ່ວຍເຫຼືອມຽນມາພັດທະນາເສດຖະກິດແລະສ້າງຜົນປະໂຫຍດໃຫ້ແກ່ປະຊາຊົນມຽນມາໄດ້ໂດຍໄວ. ຢູ່ອິນໂດເນເຊຍ, ຈີນແລະອິນໂດເນເຊຍໄດ້ຕັ້ງໜ້າເຮັດໃຫ້ຂໍ້ລິເລີ່ມ “ໜຶ່ງແລວໜຶ່ງເສັ້ນທາງ” ເຊື່ອມຕໍ່ກັບຍຸດທະສາດສູນກາງມະຫາສະໝຸດໂລກ. ຢູ່ຟີລິບປີນ, ສອງຝ່າຍເຫັນດີລົງເລິກການເຊື່ອມຈອດກັນລະຫວ່າງຂໍ້ລິເລີ່ມ “ໜຶ່ງແລວໜຶ່ງເສັ້ນທາງ” ກັບແຜນຍຸດທະສາດ “ການກໍ່ສ້າງທີ່ຍິ່ງໃຫຍ່”, ໃນນັ້ນ, ໂຄງການສຳຄັນທີ່ໄດ້ສ້າງສຳເລັດມີ 11 ໂຄງການແລ້ວ, ຍັງມີ 10 ກວ່າໂຄງການພວມເອົາໃຈໃສ່ຈັດຕັ້ງປະຕິບັດຢູ່ຫຼືວ່າກຽມລົງມືປະຕິບັດ. ຄວາມຈິງໄດ້ພິສູດໃຫ້ເຫັນວ່າ: ຂໍ້ລິເລີ່ມ “ໜຶ່ງແລວໜຶ່ງເສັ້ນທາງ” ມີພະລັງຊີວິດທີ່ເຂັ້ມແຂງ.
ປີ 2021 ແມ່ນປີທີ່ຈີນແລະອາຊຽນສ້າງຕັ້ງສາຍພົວພັນຄູ່ເຈລະຈາຄົບຮອບ 30 ປີ, ການພົວພັນລະຫວ່າງສອງຝ່າຍໄດ້ຢືນຢູ່ຈຸດເລີ່ມຕົ້ນໃໝ່, ທັງໄດ້ຜະເຊີນໜ້າກັບໂອກາດໃໝ່. ການພົວພັນຈີນ-ອາຊຽນທີ່ກ້າວເຂົ້າສູ່ປີທີ່ 30 ຈະສຸກງອມກວ່າເກົ່າແລະມີຄວາມໝັ້ນໃຈຫຼາຍກວ່າເກົ່າ, ບາດກ້າວເດີນທີ່ສ້າງປະຊາຄົມຮ່ວມຊາຕາກຳຈີນ-ອາຊຽນຈະໝັ້ນທ່ຽງກວ່າເກົ່າແລະມີພະລັງແຮງຫຼາຍກວ່ເກົ່າ, ເຊິ່ງຈະກາຍເປັນແບບຢ່າງໃຫ້ແກ່ການສ້າງປະຊາຄົມຮ່ວມຊາຕາກຳຂອງມວນມະນຸດ.
ຄຳເຫັນ
0