ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ກອງປະຊຸມຖະແຫຼງຂ່າວຂອງກົນໄກຮ່ວມກັນປ້ອງກັນແລະຄວບຄຸມພະຍາດໂຄວິດ-19ຂອງລັດຖະບານຈີນໄດ້ຈັດຂຶ້ນໃນວັນທີ 20 ມັງກອນນີ້, ທ່ານຫວາງປິ່ນ ເຈົ້າໜ້າທີ່ກວດກາຂອງກົມຄວບຄຸມພະຍາດຕິດແປດຂອງຄະນະກຳມະການສາທາລະນະສຸກແຫ່ງຊາດຈີນໄດ້ເປີດເຜີຍໃຫ້ຮູ້ໃນກອງປະຊຸມຖະແຫຼງຂ່າວວ່າ: ນັບມາຮອດປັດຈຸບັນ, ທົ່ວປະເທດຈີນໄດ້ສັກວັກຊີນປ້ອງກັນພະຍາດໂຄວິດ-19 ໃຫ້ປະຊາຊົນໄດ້ຫຼາຍກວ່າ 15 ລ້ານເທື່ອຄົນແລ້ວ.
ທ່ານຫວາງປິ່ນກ່າວວ່າ: ປັດຈຸບັນ, ຈີນໄດ້ຊຸກຍູ້ການປະຕິບັດວຽກງານສັກວັກຊີນປ້ອງກັນພະຍາດໂຄວິດ-19ຢ່າງໜັກແໜ້ນແລະເປັນລະບຽບຮຽບຮ້ອຍ. ວຽກງານຈຸດສຸມທີ່ເປັນບູລິມະສິດໃນປັດຈຸບັນຄື ການສັກວັກຊີນໃຫ້ກຸ່ມຄົນເປົ້າໝາຍຕົ້ນຕໍຈຳນວນໜຶ່ງເຊັ່ນຜູ້ປະຕິບັດວຽກງານຢູ່ດ່ານຊາຍແດນ, ຜູ້ເຮັດວຽກໃນຂະແໜງການຄົມມະນາຄົມສາກົນແລະພາຍໃນປະເທດ, ຜູ້ປະຕິບັດວຽກງານສະເພາະຮັບປະກັນການເຄື່ອນໄຫວຂອງສັງຄົມໃຫ້ໄດ້ຂັ້ນພື້ນຖານ ກໍຄື ກຸ່ມຄົນທີ່ໃຫ້ ບໍລິການສາທາລະນະທາງສັງຄົມ. ນັບມາຮອດປັດຈຸບັນ, ຈຳນວນຄົນທີ່ໄດ້ຮັບການສັກວັກຊີນແລ້ວມີຫຼາຍກວ່າ 15 ລ້ານເທື່ອຄົນ.
ໃນກອງປະຊຸມຖະແຫຼງຂ່າວທີ່ຈັດຂຶ້ນໃນມື້ດຽວກັນ, ທ່ານໝີ້ເຟິ່ງ ໂຄສົກຄະນະກຳມະການສາທາລະນະສຸກແຫ່ງຊາດຈີນຍັງໄດ້ແຈ້ງສະພາບການກ່ຽວກັບການເຄື່ອນໄຫວຂອງໜ່ວຍຊ່ຽວຊານສາກົນຂອງອົງການອະນາໄມໂລກໃນຈີນວ່າ:
“ໜ່ວຍຊ່ຽວຊານສາກົນຂອງອົງການອະນາໄມໂລກໄດ້ເດີນທາງໄປເຖິງນະຄອນອູຮັ້ນໃນວັນທີ 14 ມັງກອນນີ້, ປັດຈຸບັນ ກຳລັງຢູ່ໃນໄລຍະເວລາກັກບໍລິເວນຢູ່, ໃນໄລຍະນີ້, ຜູ້ຊ່ຽວຊານຈີນແລະຕ່າງປະເທດໄດ້ຈັດກອງປະຊຸມທາງວີດີໂອຫຼາຍຄັ້ງເພື່ອຮ່ວມກັນປຶກສາຫາລືແລະຕົກລົງແຜນປະຕິບັດງານ. ສອງຝ່າຍຈະຊຸກຍູ້ການປະຕິບັດວຽກງານສືບຫາແຫຼ່ງກຳເນີດຂອງເຊື້ອພະຍາດໂຄວິດ-19 ຢ່າງເປັນລະບຽບຮຽບຮ້ອຍຕາມແຜນການທີ່ໄດ້ຕົກລົງກັນໃນເດືອນກໍລະກົດປີ2020. ”
ຄຳເຫັນ
0