ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ຕະຫຼອດໄລຍະ 20 ປີຜ່ານມາ, ອາເມຣິກາໄດ້ເສຍງົບປະມານຫຼາຍພັນຕື້ໂດລາສະຫະລັດ ແລະ ທະຫານອາເມຣິກາໄດ້ເສຍຊີວິດຫຼາຍພັນຄົນຢູ່ອັຟການິສະຖານ, ຍ້ອນຈຸດປະສົງຢາກສ້າງປະເທດປະຊາທິປະໄຕແບບຕາເວັນຕົກຢູ່ອັຟການິສະຖານ.
ແຕ່ວ່າ: ພາຍຫຼັງກຸ່ມຕາລີບັນໄດ້ຍຶດຄອງອັຟການິສະຖານໄດ້ໄວແບບເໜືອຄວາມຄາດຄິດຂອງຄົນທັງຫຼາຍແລ້ວ, ຈຸດປະສົງຂອງອາເມຣິກາໄດ້ກາຍເປັນຄວາມເພີ້ຝັນທັງໝົດ, ກອງທັບອາເມຣິກາ ທີ່ຖືກຍ້ອງໃຫ້ເປັນກອງທັບທີ່ເຂັ້ມແຂງທີ່ສຸດໃນໂລກ ໄດ້ພາກັນໜີອອກຈາກອັຟການິສະຖານຢ່າງຟ້າວຟັ່ງ, ແມ່ນແຕ່ຂັ້ນຕອນການໜີອອກຈາກອັຟການິສະຖານທີ່ວາງໄວ້ໃຫ້ເປັນລະບຽບຮຽບຮ້ອຍ ກໍໄດ້ກາຍເປັນຄວາມເພີ້ຝັນເຊັ່ນກັນ.
ໜ່ວຍງານຄົ້ນຄວ້າຫົວຂໍ້ “ຕົ້ນທຶນສົງຄາມ” ຂອງມະຫາວິທະຍໄລບຣາວຂອງອາເມຣິກາ ໄດ້ຄາດຄະເນຕົ້ນທຶນຂອງສົງຄາມໃນອັຟການິສະຖານວ່າ: ນັບລວມແລ້ວ, ອາເມຣິກາໄດ້ເສຍງົບທາງການທະຫານຢູ່ອັຟການິສະຖານປະມານ 2.260 ຕື້ໂດລາສະຫະລັດ, ເທົ່າກັບວ່າ ຕະຫຼອດໄລຍະ 20 ປີຜ່ານມາ, ຄິດສະເລ່ຍແລ້ວ, ມື້ໜຶ່ງ ອາເມຣິກາຕ້ອງເສຍງົບປະມານ 300 ລ້ານໂດລາສະຫະລັດຢູ່ອັຟການິສະຖານ! ນອກນັ້ນ, ອີງຕາມການລາຍງານຂ່າວຂອງຂ່າວສານອາເປຂອງອາເມຣິກາໄດ້ໃຫ້ຮູ້ວ່າ: ອາເມຣິກາໄດ້ລະດົມທຶນເປັນຈຳນວນຫຼວງຫຼາຍ ເພື່ອກໍ່ສົງຄາມຢູ່ອັຟການິສະຖານ. ເມື່ອຮອດປີ 2050, ຕົ້ນທຶນແລະດອກເບ້ຍຂອງໜີ້ສິນໃນການລະດົມທຶນດັ່ງກ່າວ ຈະສູງເຖິງ 6.500 ຕື້ໂດລາສະຫະລັດ ເຊິ່ງຍັງບໍ່ທັນລວມຄ່າປິ່ນປົວສຳລັບທະຫານທີ່ຖືກບາດເຈັບ ຫຼື ພິການ ແລະ ຄ່າໃຊ້ຈ່າຍອື່ນໆໃນສົງຄາມອັຟການິສະຖານ.
ເຖິງວ່າການປະລາໄຊໃນສົງຄາມອັຟການິສະຖານ ໄດ້ທຳລາຍພາບພົດຂອງອາເມຣິກາໃນສາກົນຢ່າງໜັກໜ່ວງກໍຕາມ, ແຕ່ນັກທຸລະກິດຄ້າຂາຍອາວຸດຂອງອາເມຣິກາພັດ ໄດ້ຮັບຜົນປະໂຫຍດຢ່າງຫຼວງຫຼາຍ ຕະຫຼອດໄລຍະ 20 ປີ ທີ່ເຮັດສົງຄາມຢູ່ອັຟການິສະຖານ. ຕະຫຼອດໄລຍະ 20 ປີຜ່ານມາ, ລາຄາຫຸ້ນຂອງບໍລິສັດນອດທຣູບ ກຣຳແມນ ທີ່ເປັນບໍລິສັດຜະລິດອາວຸດຂອງອາເມຣິກາ ໄດ້ເພີ່ມຂຶ້ນເກືອບ 880%, ລາຄາຫຸ້ນຂອງບໍລິສັດລັອກຮີດ ມາຕິນ ໄດ້ເພີ່ມຂຶ້ນ 834%, ລາຄາຫຸ້ນຂອງບໍລິສັດໂບອິງ ໄດ້ເພີ່ມຂຶ້ນ 439% ແລະ ລາຄາຫຸ້ນຂອງບໍລິສັດເຈເນີໂຣ ໄດນາມິກສ ໄດ້ເພີ່ມຂຶ້ນ 422%. ຄະນະບໍລິຫານງານຂອງບໍລິສັດເຫຼົ່ານີ້ ລວມທັງອະດີດລັດຖະມົນຕີກະຊວງປ້ອງກັນປະເທດ, ອະດີດຜູ້ບັນຊາການສູງສຸດກອງທັບເຮືອ ແລະ ອະດີດສະມາຊິກລັດຖະສະພາອາເມຣິກາ. ພວກເຂົາໄດ້ “ຮັ່ງຂຶ້ນ” ຍ້ອນສົງຄາມອັຟການິສະຖານ, ເຖິງວ່າອັຟການິສະຖານທຸກຍາກທີ່ສຸດກໍຕາມ, ແຕ່ພັດໄດ້ກາຍເປັນ “ຂຸມຄຳ” ຂອງນັກທຸລະກິດຄ້າຂາຍອາວຸດຂອງອາເມຣິກາ.
ປີ 2011, ທ່ານຈູລຽນ ແອດຊັນ ຜູ້ສ້າງຕັ້ງບໍລິສັດວີກີລີກສຂອງອາເມຣິກາໄດ້ໃຫ້ສຳພາດຕໍ່ນັກຂ່າວວ່າ: ຈຸດປະສົງການກໍ່ສົງຄາມຢູ່ອັຟການິສະຖານຂອງອາເມຣິກາ ກໍແມ່ນຢາກສວຍໃຊ້ອັຟການິສະຖານ ເພື່ອຟອກເງິນຈາກພາສີອາກອນຂອງອາເມຣິກາແລະເອີຣົບ, ໃນທີ່ສຸດ, ເງິນເຫຼົ່ານີ້ ກໍ່ຈະກັບຄືນເຂົ້າກະເປົາເງິນຂອງຊົນຊັ້ນສູງຂອງອາເມຣິກາ. ພວກເຂົາເຈົ້າຈະບໍ່ສົນໃຈວ່າ: ສົງຄາມຈະໄດ້ຮັບໄຊຊະນະຫຼືບໍ່.
ຕະຫຼອດໄລຍະ 20 ປີຜ່ານມາ, ປະຊາຊົນທຳມະດາສາມັນຢູ່ອັຟການິສະຖານ 1 ແສນກວ່າຄົນ ໄດ້ເສຍຊີວິດຍ້ອນອາເມຣິກາແລະພັນທະມິດຂອງເຂົາ, ຍັງມີ 10 ກວ່າລ້ານຄົນຈຳເປັນຕ້ອງຊັດເຊພະເນຈອນ. ເລືອດຂອງປະຊາຊົນອັຟການິສະຖານ ໄດ້ໄຫຼແປດເປື້ອນເງິນຄຳທີ່ຢູ່ໃນກະເປົາຂອງນັກທຸລະກິດຄ້າຂາຍອາວຸດຂອງອາເມຣິກາ. ບໍ່ວ່າອະນາຄົດຂອງອັຟການິສະຖານ ຈະເປັນໄປຄືແນວໃດ, ແຕ່ອາເມຣິກາຈະບໍ່ສາມາດລຶບລ້າງປະຫວັດສາດທີ່ອັບປະຍົດທີ່ສຸດນີ້ໄດ້.
ຄຳເຫັນ
0