ຕາມຂ່າວສານຊິນຮວາ: ທ່ານຫຼີເຄີ້ສຽງ ນາຍົກລັດຖະມົນຕີຈີນໄດ້ຂຽນບົດຄວາມທີ່ພາດຫົວ "ພະຍາຍາມສ້າງຜົນງານໃໝ່ໃນການຮ່ວມມືໄມຕີຈິດຈີນ-ນູແວນຊີລັງ" ໃນໜັງສືພິມ "New Zealand Herald" ສະບັບວັນທີ 27 ມີນາຂອງນູແວນຊີລັງ.
ບົດຄວາມີເນື້ອໃນວ່າ, ປີນີ້ເປັນປີຄົບຮອບ 45 ປີໃນການສ້າງສາຍສຳພັນທາງການທູດລະຫວ່າງຈີນ-ນູແວນຊີລັງ, ຂ້າພະເຈົ້າມີຄວາມປາຖະໜາເປັນຢ່າງຍິ່ງໃນການຮັດແໜ້ນສາຍພົວພັນມິດຕະພາບລະຫວ່າງສອງປະເທດ ແລະຍົກລະດັບການຮ່ວມມືທີ່ຕ່າງຝ່າຍຕ່າງມີຜົນປະໂຫຍດ. ໃນຫຼາຍປີມໍ່ໆມານີ້, ສາຍພົວພັນຈີນ-ນູແວນຊີລັງໄດ້ຈັດຢູ່ແຖວໜ້າໃນສາຍພົວພັນລະຫວ່າງຈີນກັບປະເທດຕາເວັນຕົກ. ຂະນະທີ່ 45 ປີຜ່ານມາ, ການຮ່ວມມືໃນຂົງເຂດຕ່າງໆລະຫວ່າງສອງປະເທດໄດ້ກ້າວຂຶ້ນສູ່ລະດັບສູງທີ່ບໍ່ເຄີຍມີມາກ່ອນ. ນັບແຕ່ຈີນແລະນູແວນຊີລັງເຊັນສັນຍາການຄ້າເສລີ 8 ປີມານີ້, ຍອດມູນຄ່າການຄ້າລະຫວ່າງສອງປະເທດໄດ້ເພີ່ມຂຶ້ນເກືອບ 3 ເທົ່າ. ແນວໃດກໍດີ ເຖິງວ່າຈີນເສຍປຽບດຸນການຄ້າກັບນູແວນຊີລັງ, ແຕ່ພວກເຮົາຍັງຕ້ອງການເປີດກວ້າງຕະຫຼາດສອງຕໍ່ສອງອີກ ໃນໂອກາດການເຈລະຈາຍົກລະດັບສັນຍາການຄ້າເສລີ.
ອາລິຍະທຳຈີນສົ່ງເສີມເປີດປະຕູແບບໂອບອ້ອມອາລີ ແລະອາລິຍະທຳນູແວນຊີລັງມີຫຼາກຫຼາຍສີສັນແລະເຕັມໄປດ້ວຍພະລັງຊີວິດ ເຊິ່ງຈີນແລະນູແວນຊີລັງຄວນຮ່ວມກັນສົ່ງເສີມໂລກ ແລະວັດທະນະທຳທີ່ມີຫຼາກຫຼາຍສີສັນ, ທັງຮ່ວມກັນເພີ່ມສີສັນ ແລະຄວາມໂດດເດັ່ນໃຫ້ແກ່ການພັດທະນາອາລິຍະທຳຂອງໂລກ.