ບໍລິສັດ UnionPay ສາກົນຂອງຈີນຮ່ວມກັບ MasterCardແລະ Visaທີ່ມີຊື່ສຽງໃນໂລກໄດ້ຖະແຫຼງໃນວັນທີ 9 ພຶດສະພານີ້ຢູ່ນະຄອນຫຼວງບາງກອກປະເທດໄທວ່າ: ສາມຝ່າຍຈະຮ່ວມກັນນຳສະເໜີມາດຕະຖານການຊຳລະດ້ວຍQR Codeທີ່ໃຊ້ໄດ້ທົ່ວໄປຢູ່ປະເທດໄທໂດຍຖືເປັນມາດຕະຖານຂອງທະນາຄານກາງໄທນຳສະເໜີຕໍ່ສະຖາບັນການເງິນແລະຫົວໜ່ວຍທຸລະກິດຢູ່ປະເທດດັ່ງກ່າວ ເພື່ອຊ່ວຍເພີ່ມປະສິດທິພາບໃນການຊຳລະທາງເອເລັກໂຕຣນິກໃຫ້ສູງຂຶ້ນຢ່າງວ່ອງໄວ.
ຂ່າວແຈ້ງວ່າ: ມາດຕະຖານດັ່ງກ່າວນີ້ຈະກຳນົດອອກໃນໄຕມາດທີ 3 ຂອງປີນີ້ໂດຍຫົວໜ່ວຍທຸລະກິດສາມາດນຳໃຊ້ QR Codeທົ່ວໄປຊຳລະຜ່ານມືຖືດ້ວຍບັດເຄຣດິດສາກົນໄດ້ທັງ UnionPay, MasterCardແລະ Visa.
ຜູ້ຊີ້ນຳ ບໍລິສັດ UnionPay ສາກົນຈີນຢືນຢັນວ່າ ການຮ່ວມມືເທື່ອນີ້ເປັນຂີດໝາຍສະແດງໃຫ້ເຫັນວ່າ ມາດຕະຖານການຊຳລະຜ່ານມືຖືຂອງ UnionPay ໄດ້ຮັບການຢືນຢັນແລະສະໜັບສະໜູນຈາກຕະຫຼາດສາກົນແລ້ວ ເຊິ່ງສາມາດເສີມຂະຫຍາຍບົດບາດເປັນໂຕແບບໃຫ້ແກ່ການເຜີຍແຜ່ນຳໃຊ້ມາດຕະຖານການຊຳລະດ້ວຍQR Codeຂອງ UnionPayໄປສູ່ໂລກ.
ປັດຈຸບັນ, ຕູ້ ATM ເກືອບທຸກແຫ່ງແລະຫົວໜ່ວຍທຸລະກິດ 90% ຢູ່ໄທສາມາດໃຊ້ບັດUnionPayແລ້ວ. ນອກນີ້, ບໍລິສັດ UnionPay ສາກົນຈີນຍັງໄດ້ປະດິດສ້າງຜະລິດຕະພັນການຊຳລະເພື່ອເຮັດໃຫ້ລູກຄ້າຢູ່ໄທມີໂອກາດນຳໃຊ້ບັດ UnionPayໄດ້ຫຼາຍຂຶ້ນຕື່ມ.