ຂ່າວສານເອມີເຣດ ຫຼື WAM ໄດ້ລາຍງານເມື່ອບໍ່ດົນນີ້ວ່າ: ບໍລິສັດປະກັນສິນເຊື່ອການລົງທຶນແລະສົ່ງອອກອາຣັບ ທີ່ມີສຳນັກງານໃຫຍ່ຕັ້ງຢູ່ກູເວດ ໄດ້ເຜີຍແຜ່ບົດລາຍງານວ່າ ປີຜ່ານມາ, ຈີນເປັນປະເທດທີ່ລົງທຶນຢູ່ປະເທດອາຣັບຫຼາຍທີ່ສຸດ.
ບົດລາຍງານດັ່ງກ່າວໄດ້ອ້າງຕາມ "ບົດລາຍງານການລົງທຶນໃນທົ່ວໂລກປີ 2017" ຂອງກອງປະຊຸມການຄ້າແລະການພັດທະນາອົງການສະຫະປະຊາຊາດ ແລະການສົມທຽບກັບຕົວເລກການລົງທຶນໂດຍກົງຈາກຕ່າງປະເທດ ຫຼື FDI ຂອງປະເທດຕ່າງໆ ໂດຍຊີ້ໃຫ້ເຫັນວ່າ, FDI ຂອງປະເທດອາຣັບ ໄດ້ເພີ່ມຈາກ 24 ຕື້ 600 ລ້ານໂດລາສະຫະລັດເມື່ອປີ 2015 ຂຶ້ນເປັນ 30 ຕື້ 800 ລ້ານໂດລາສະຫະລັດເມື່ອປີຜ່ານມາ ເຊິ່ງກວມ 1,8% ຂອງຍອດ FDI ທົ່ວໂລກ ແລະ ກວມ 4,8% ຂອງຍອດ FDI ປະເທດທີ່ພວມພັດທະນາ. ຂະນະທີ່ຈີນເປັນປະເທດລົງທຶນຕົ້ນຕໍໃນພາກພື້ນອາຣັບ ໂດຍປີຜ່ານມາ, ຍອດມູນຄ່າການລົງທຶນບັນລຸເຖິງ 29 ຕື້ 500 ລ້ານໂດລາສະຫະລັດ ກວມ 31,9% ຖັດມາແມ່ນສະຫະລັດອາຣັບເອມີເຣດ 15 ຕື້ 200 ລ້ານໂດລາສະຫະລັດ ກວມ 16,4% ແລະ ອາເມລິກາ 7 ຕື້ໂດລາສະຫະລັດ ກວມ 7,6%.