ວັນທີ 23 ຕຸລານີ້, ທ່ານລີຊຽນລົງ ນາຍົກລັດຖະມົນຕີສິງກະໂປຢ້ຽມຢາມທຳນຽບຂາວອາເມລິກາເປັນເທື່ອທີສອງນັບແຕ່ເດືອນສິງຫາປີ 2016 ເປັນຕົ້ນມາ ແລະພົບປະເຈລະກາກັບທ່ານທຣຳ ປະທານາທິບໍດີອາເມລິກາ ທັງເປັນການພົບປະອີກຄັ້ງພາຍຫຼັງກອງປະຊຸມສຸດຍອດຮຳເບີກG20.
ໃນການພົບປະຄັ້ງນີ້, ທ່ານລີຊຽນລົງກ່າວວ່າ: ສອງຝ່າຍໄດ້ຢືນຢັນອີກເທື່ອໜຶ່ງວ່າ ສິງກະໂປກັບອາເມລິກາຈະລົງເລິກສາຍພົວພັນຄູ່ຮ່ວມທີ່ມີມາຍາວນານເຖິງ 51 ປີຂຶ້ນຕື່ມອີກ, ສືບຕໍ່ເປີດກວ້າງການຮ່ວມມືທາງດ້ານເສດຖະກິດ, ຄວາມໝັ້ນຄົງ ແລະຂົງເຂດອື່ນໆ.
ທ່ານທຣຳກ່າວວ່າ: ສິງກະໂປເປັນພັນທະມິດສຳຄັນຂອງປະເທດຕົນໃນພາກພື້ນອາຊີປາຊີຟິກ. ທ່ານໄດ້ຊົມເຊີຍການພັດທະນາ ແລະຄວາມກ້າວໜ້າຂອງເສດຖະກິດ-ສັງຄົມສິງກະໂປໃນໄລຍະ 50 ກວ່າປີຜ່ານມາ ແລະຢືນຢັນຕໍ່ຄວາມພະຍາຍາມໃນການຕໍ່ຕ້ານກຸ່ມIS. ສອງປະເທດຈະເພີ່ມທະວີການຮ່ວມມືທາງດ້ານການປະຕິບັດກົດໝາຍ, ຕ້ານການກໍ່ການຮ້າຍ, ຄວາມໝັ້ນຄົງທາງອິນເຕີເນັດ ແລະຂົງເຂດອື່ນໆ.