ຕາມຂ່າວCRI: ໃນການຖະແຫຼງຂ່າວທີ່ຈັດຂຶ້ນໃນວັນທີ 18 ມັງກອນນີ້, ທ່ານ ລູ້ຄ່າງ ໂຄສົກກະຊວງການຕ່າງປະເທດຈີນກ່າວວ່າ: ຫວ່າງມໍ່ໆມານີ້, ທັງສອງຝ່າຍເໜືອໃຕ້ຂອງແຫຼມເກົາຫຼີໄດ້ບັນລຸການຮ່ວມມືກ່ຽວກັບຫົວຂໍ້ງານໂອລິມປິກລະດູໜາວພຽງຊາງແລະທ່າທີຂອງສອງຝ່າຍທີ່ຍິນດີເພີ່ມທະວີການເຈລະຈາຕື່ມອີກໂດຍບໍ່ຈຳກັດແຕ່ຫົວຂໍ້ງານໂອລິມປິກລະດູໜາວເທົ່ານັ້ນ ເຊິ່ງໄດ້ເຮັດໃຫ້ສະຖານະການຂອງແຫຼມເກົາຫຼີຜ່ອນຄາຍລົງ, ບັນດາຝ່າຍຄວນຖະນຸຖະໜອມສະຖານະການນີ້, ກຳໂອກາດແລະເຊີນຊວນການເຈລະຈາໂດຍສັນຕິຢ່າງຕັ້ງໜ້າ, ເພື່ອເຮັດໃຫ້ສະຖານະການແຫຼມເກົາຫຼີພັດທະນາໄປຕາມທິດທາງທີ່ຖືກຕ້ອງຕື່ມອີກ.
ຂ່າວແຈ້ງວ່າ: ໃນວັນທີ 17 ມັງກອນນີ້, ຜູ້ຕາງໜ້າຂອງ ສປປ ເກົາຫຼີ ແລະ ສ.ເກົາຫຼີ ໄດ້ຈັດການເຈລະຈາຢູ່ປານມູນຈອມ ໂດຍເຫັນດີຈະເຂົ້າຮ່ວມພິທີໄຂງານໂອລິມປິກລະດູໜາວພຽງຊາງແລະຮ່ວມກັນຈັດເປັນໜ່ວຍເຂົ້າຮ່ວມການແຂ່ງຂັນແລະມາດຕະການອື່ນໆໂດຍຈະຊັກ "ທຸງແຫຼມເກົາຫຼີ"ຂຶ້ນ.ນອກນີ້, ທ່ານນາງ ຄຽງວາຄາງ ລັດຖະມົນຕີກະຊວງການຕ່າງປະເທດ ສ.ເກົາຫຼີ ກ່າວໃນຫວ່າງມໍ່ໆນີ້ວ່າ: ການເຈລະຈາລະຫວ່າງ ສປປ ເກົາຫຼີ - ສ.ເກົາຫຼີ ໃນປັດຈຸບັນສາມາດບັນລຸທີ່ຈະເຈລະຈາກ່ຽວກັບການແກ້ໄຂບັນຫາແຫຼມເກົາຫຼີໂດຍສັນຕິ. ສ.ເກົາຫຼີ ຍິນດີຊຸກຍູ້ການເຈລະຈາຕື່ມອີກ. ຕໍ່ເລື່ອງນີ້, ທ່ານ ລູ້ຄ່າງ ໄດ້ໃຫ້ທັດສະນະດັ່ງກ່າວໃນຂະນະທີ່ຕອບຄຳຖາມທີ່ກ່ຽວຂ້ອງຂອງນັກຂ່າວ.
ທ່ານ ລູ້ຄ່າງ ກ່າວເນັ້ນວ່າ: ສິ່ງທີ່ສຳຄັນໃນປັດຈຸບັນແມ່ນທ່າທີທີ່ຕັ້ງໜ້າລະຫວ່າງເໜືອ-ໃຕ້ສາມາດດຳເນີນໄປດ້ວຍດີ, ສ້າງຄວາມໄວ້ເນື້ອເຊື່ອໃຈໃນການເຈລະຈາ, ສ້າງພື້ນຖານຄວາມຮັບຮູ້ຢ່າງເປັນເອກະພາບ ແລະຄົ້ນຄວ້າປຶກສາຫາລືເພື່ອສະແຫວງຫາຊ່ອງທາງແກ້ໄຂ, ເພື່ອໃຫ້ປະສົບຜົນສຳເລັດທີ່ທັງສອງຝ່າຍລ້ວນແຕ່ສາມາດຮັບເອົາໄດ້,ບັນລຸການປອດນິວເຄລຍຂອງແຫຼມເກົາຫຼີ, ສ້າງສະຖານະການໃຫ້ມີສັນຕິພາບແບບຍາວນານຂອງແຫຼມເກົາຫຼີ.