ຕາມຂ່າວ CRI: ວັນທີ 20 ມັງກອນນີ້ ໂທລະພາບອູຍແກຼນລາຍງານວ່າ, ຍ້ອນຂາດເຂີນທຶນຮອນ, ອົງການຟ້າວຂອງສະຫະປະຊາຊາດຕົກລົງຢຸດຕິວຽກຊ່ວຍເຫຼືອດ້ານມະນຸດສະທຳຢູ່ເຂດຕັນບັສທີ່ພາກຕາເວັນອອກຂອງອູຍແກຼນທີ່ເກີດການປະທະກັນ.
ຂ່າວຈາກສື່ມວນຊົນທ້ອງຖີ່ນລາຍງານວ່າ, ວຽກງານຫ້າງຫາທຶນທີ່ກ່ຽວຂ້ອງຄືບໜ້າໄປຢ່າງຊັກຊ້າ, ທຶນທີ່ຜູ້ບໍລິຈາກຮັບປາກຈະບໍລິຈາກນັ້ນບໍ່ສາມາດເຂົ້າບັນຊີຢ່າງທັນການແມ່ນສາເຫດຕົ້ນຕໍທີ່ພາໃຫ້ອົງການຟ້າວຂາດເຂີນທຶນຮອນ. ສະນັ້ນ ອົງການດັ່ງກ່າວໄວສຸດຈະຟື້ນຟູວຽກງານຊ່ວຍເຫຼືອຢູ່ເຂດດັ່ງກ່າວໃນກາງປີ 2018.
ອົງການສະຫະປະຊາຊາດເລີ່ມໃຫ້ການຊ່ວຍເຫຼືອດ້ານອາຫານແກ່ປະຊາຊົນທີ່ຢູ່ເຂດທີ່ເກີດມີການປະທະກັນທີ່ພາກຕາເວັນອອກຂອງອູຍແກຼນແຕ່ເດືອນພະຈິກ 2014 ເປັນຕົ້ນມາ. ຂໍ້ມູນຈາກອົງການຟ້າວສະແດງໃຫ້ເຫັນວ່າ ນັບມາຮອດເດືອນມິຖຸນາ 2017 ໄດ້ມີປະຊາຊົນ 9 ແສນ 7 ໝື່ນກວ່າຄົນໄດ້ຮັບການຊ່ວຍເຫຼືອ, ເຊິ່ງເປັນກຸ່ມຄົນທີ່ດຳລົງຊີວິດຢ່າງທຸກຍາກທີ່ສຸດຢູ່ເຂດປະທະກັນ, ລວມທັງຜູ້ເຖົ້າປ່ຽວພອຍ, ແມ່ຍິງທີ່ລ້ຽງລູກໂດຍຕົນເອງ ແລະຜູ້ທີ່ເສຍຄວາມສາມາດໃນການອອກແຮງງານຍ້ອນເປັນພະຍາດ.
ບົດລາຍງານຂອງສະຫະປະຊາຊາດສະແດງໃຫ້ເຫັນວ່າ ປັດຈຸບັນ ຢູ່ເຂດປະທະກັນທີ່ພາກຕາເວັນອອກຂອງອູຍແກຼນມີປະຊາຊົນເກືອບ 3 ລ້ານຄົນ, ອຸປະກອນດຳລົງຊີວິດພື້ນຖານຂອງຄົນສ່ວນຫຼາຍຍາກທີ່ຈະໄດ້ຮັບການຮັບປະກັນ.
 |
