ຂ່າວສານສູນກາງເກົາຫຼີລາຍງານໃນວັນທີ 21 ເມສານີ້ວ່າ: ກອງປະຊຸມຄົບຄະນະເທື່ອທີ 3 ຂອງຄະນະກຳມະການສູນກາງພັກແຮງງານເກົາຫຼີຊຸດທີ 7 ທີ່ຈັດຂຶ້ນໃນວັນທີ 20 ເມສານີ້ໄດ້ຕົກລົງວ່າ ເລີ່ມແຕ່ວັນທີ 21 ເມສາ 2018 ນີ້ເປັນຕົ້ນໄປ, ສປປ ເກົາຫຼີຈະຢຸດຕິການທົດລອງອາວຸດນິວເຄລຍແລະທົດລອງຍິງຂີປະນາວຸດຂ້າມທະວີບ.
ມະຕິຫຼາຍສະບັບທີ່ໄດ້ຮັບຮອງໃນກອງປະຊຸມດັ່ງກ່າວຍັງປະກອບມີເນື້ອໃນທີ່ວ່າ: ເພື່ອຮັກສາຄວາມໂປ່ງໃສຂອງການຢຸດຕິການທົດລອງອາວຸດນິວເຄລຍ, ສປປ ເກົາຫຼີຈະເຊົາໃຊ້ສະໜາມທົດລອງນິວເຄລຍຢູ່ພາກເໜືອຂອງປະເທດຕົນ. ການທີ່ຢຸດຕິການທົດລອງນິວເຄລຍເປັນບາດກ້າວສຳຄັນໃນການບັນລຸການຫຼຸດກຳລັງຮົບນິວເຄລຍຂອງໂລກ ແລະສປປ ເກົາຫຼີຈະເຂົ້າຮ່ວມຄວາມພະຍາຍາມຂອງໂລກເພື່ອບັນລຸເປົ້າໝາຍແຫ່ງການຢຸດຕິການທົດລອງນິວເຄລຍຢ່າງຮອບດ້ານ.
ມະຕິຍັງລະບຸວ່າ: ພາຍໃຕ້ກໍລະນີທີ່ບໍ່ໄດ້ຮັບໄພຂົ່ມຂູ່ຫຼືການທ້າທາຍເກາະຜິດດ້ວຍອາວຸດນິວເຄລຍນັ້ນ, ສປປ ເກົາຫຼີຈະບໍ່ນຳໃຊ້ອາວຸດນິວເຄລຍເດັດຂາດ ແລະກໍຈະບໍ່ໂອນອາວຸດນິວເຄລຍແລະເຕັກນິກນິວເຄລຍບໍ່ວ່າໃນກໍລະນີໃດກໍຕາມ.
ກອງປະຊຸມຍັງຕົກລົງຈະລະດົມຂົນຂວາຍຊັບພະຍາກອນມະນຸດແລະວັດຖຸຂອງສປປ ເກົາຫຼີເພື່ອສຸມທຸກຄວາມພະຍາຍາມເຂົ້າໃນການຕໍ່ສູ້ແຫ່ງການພັດທະນາເສດຖະກິດສັງຄົມນິຍົມແລະຍົກລະດັບຊີວິດການເປັນຢູ່ຂອງປະຊາຊົນໃຫ້ສູງຂຶ້ນ. ເພື່ອສ້າງສະພາບແວດລ້ອມສາກົນທີ່ເປັນຜົນດີຕໍ່ການສ້າງສາເສດຖະກິດສັງຄົມນິຍົມ, ປົກປັກຮັກສາສັນຕິພາບແລະສະຖຽນລະພາບຂອງແຫຼມເກົາຫຼີກໍຄືຂອງໂລກ, ສປປ ເກົາຫຼີຈະຕັ້ງໜ້າພົວພັນແລະສົນທະນາຢ່າງໃກ້ຊິດກັບປະເທດອ້ອມຂ້າງແລະປະຊາຄົມໂລກ.
 |
