 |
 |
 |
 |
|
|
|
|
ວັນທີ 25 ຕຸລານີ້, ທ່ານອູຕຸ່ນຢີ ປະທານພັກກົກມິນຕັງຈີນ ໄດ້ສົ່ງໂທລະເລກຊົມເຊີຍເຖິງທ່ານສີຈິ້ນຜິງ ໃນໂອກາດໄດ້ຮັບເລືອກຕັ້ງເປັນເລຂາທິການໃຫຍ່ຄະນະກຳມະການສູນກາງພັກກອມມູນິດຈີນຊຸດໃໝ່ອີກວາລະໜຶ່ງ ໂດຍລະບຸວ່າ: ສອງພັກ ຄື ພັກກົກມິນຕັງ ແລະ ພັກກອມມູນິດຈີນ ຢູ່ບົນພື້ນຖານ "ຂໍ້ຕົກລົງ 1992" ໄດ້ພະຍາຍາມຊຸກຍູ້ການພົວພັນລະຫວ່າງສອງຝັ່ງຊ່ອງແຄບໄຕ້ຫວັນໃຫ້ຫັນຈາກການເປັນປໍລະປັກກັນຢ່າງເຄັ່ງຕຶງກັບມາເປັນການພັດທະນາໂດຍສັນຕິ, ບັນລຸໃຫ້ມີການພົບປະກັນລະຫວ່າງຜູ້ນຳສອງຝັ່ງ ແລະໄດ້ຮັບປະສິດທິຜົນໂດຍທຸກຄົນເຫັນໄດ້ຢ່າງປະຈັກຕາ. ໃນຕໍ່ໜ້າ, ຫວັງວ່າສອງພັກຈະລົງເລິກ "ຂໍ້ຕົກລົງ 1992" ຢ່າງຕໍ່ເນື່ອງ, ເພີ່ມຄວາມໄວ້ເນື້ອເຊື່ອໃຈກັນ, ຮ່ວມມືກັນດ້ວຍຄວາມຈິງໃຈ ເພື່ອສ້າງສະພາບການໃໝ່ແຫ່ງການພັດທະນາໂດຍສັນຕິລະຫວ່າງສອງຝັ່ງຊ່ອງແຄບໄຕ້ຫວັນ.
ມື້ດຽວກັນ, ທ່ານສີຈິ້ນຜິງ ກໍໄດ້ສົ່ງໂທລະເລກສະແດງຄວາມຂອບໃຈຕໍ່ທ່ານອູຕຸ່ນຢີ ໂດຍໂທລະເລກ ໄດ້ລະບຸວ່າ: ຫວັງດ້ວຍຄວາມຈິງໃຈວ່າ, ສອງພັກຈະຖືເອົາຄວາມຜາສຸກລະຫວ່າງພີ່ນ້ອງຮ່ວມຊາດສອງຝັ່ງ ແລະ ຜົນປະໂຫຍດຂອງຊົນຊາດຈີນເປັນຫຼັກ, ປັບປຸງພື້ນຖານການເມືອງທີ່ມີຢູ່ໃນປັດຈຸບັນ, ເສີມສ້າງຄວາມໄວ້ເນື້ອເຊື່ອໃຈກັນຢ່າງບໍ່ຢຸດຢັ້ງ, ເພີ່ມທະວີການແລກປ່ຽນແລະຮ່ວມມື ເພື່ອຮ່ວມກັນປະກອບສ່ວນປົກປັກຮັກສາການພັດທະນາການພົວພັນລະຫວ່າງສອງຝັ່ງຊ່ອງແຄບໄຕ້ຫວັນຢ່າງສັນຕິ ແລະ ບັນລຸເປົ້າໝາຍຟື້ນຟູຄວາມຈະເລີນຮຸ່ງເຮືອງທີ່ຍິ່ງໃຫຍ່ຂອງຊົນຊາດຈີນ.
ນອກນີ້, ທ່ານຊົ້ງສູຢີ ປະທານພັກຊິ່ນໝິນ ແລະ ທ່ານຢີ້ມູ້ຕັງ ປະທານພັກຊິ່ນຕາງ ຢູ່ໄຕ້ຫວັນ ກໍໄດ້ສົ່ງໂທລະເລກຊົມເຊີຍເຖິງທ່ານສີຈິ້ນຜິງ ເຊັ່ນດຽວກັນ.
 |
 |
 |