चीनको तिब्बतबाट बगेर आउँछ भोटेकोसी। अलिक तल आइसकेपछि यो सुनकोसी बन्छ । यसैगरी बग्दै यो सप्तकोसीमा मिसिन्छ। यही भोटेकोसी आसपास सदियौंदेखि बसोबास गर्दै आएका समुदायले कस्ता सभ्यता विकास गरे होलान्? उनीहरूको विश्वास, पद्धति, जीवन दर्शन र सामाजिक चिनारी के कस्ता छन् ? यी सबै बुझन् सिन्धुपाल्चोकको भोटेकोसी पुगिरहनु पर्दैन । ललितपुरस्थित पाटन संग्रहालयमा यति बेला 'भोटेकोसी सभ्यताको सौन्दर्य' चित्रकला प्रदर्शनी जारी छ ।
तीनदिने प्रदर्शनीको उद्घाटन गर्दै आइतबार वाङ्मय शताब्दी पुरुष सत्यमोहन जोशीले नदीसित मानिसको सभ्यता जोडिँदै आएको बताउँदै भोटेकोसी आसपासको सौन्दर्यभित्र पनि भिन्न सभ्यता र विश्वास पद्धति पाइने दाबी गर्नुभयो। जैमन थैपी नारायण मन्दिर गुठी व्यवस्थापन समितिले सिन्धुपाल्चोकको भोटेकोसी गाउँपालिका–४, फुल्पिङकट्टीस्थित नारायण मन्दिरलाई आधार बनाई वैशाख ९ देखि ११ गतेसम्म चित्र कार्यशाला गरिएको थियो।
कान्तिपुर अनलाइनका अनुसार सोही कार्यशालामा तयार पारिएको चित्रहरू प्रदर्शनीमा ल्याइएको हो । सांस्कृतिक, पुरातात्त्विक, ऐतिहासिक रूपमा फुल्पिङकट्टीस्थित नारायण मन्दिर र यसको सेरोफेरो निकै महत्त्वको रहेको बताउँदै चित्रकारहरूले त्यसलाई मिहीन ढंगले उतारेको व्यवस्थापन समितिका अध्यक्ष मेखबहादुर खड्काले बताउनुभयो।
जैमन थैपी नारायण परोपकार केन्द्रका अध्यक्ष अनेश नेपालले चाहिँ 'प्रताप मल्लका पालामा बनेका मूर्ति तथा सम्पदा फुल्पिङकट्टी क्षेत्रमा भेटिएकाले यहाँ सभ्यता निकै पुरानो रहेको पुष्टि हुने' बताउनुभयो। स्थलगत कार्यशालामा तयार पारिएको चित्रकारहरूको कलाकृति हेर्दा भोटेकोसी सभ्यतासित बौद्ध, हिन्दु र बोन गरी तीन प्रकारको विश्वास पद्धति मिसिएको देखिन्छ । विकास बिसुङे, विक्रम प्रजापतीले नारायणलाई क्यान्भासमा उतारेका छन् भने चन्द्रा श्रेष्ठले बोन संस्कृति आधारित पूजालाई । त्यसै देवेन्द्र थुम्केली, दीपेन्द्रमान बनेपाली र दिवेश प्रधानले बौद्ध स्तूप, हिगी र म्हानेलाई क्यानभासमा विषयवस्तु बनाएका छन् । कान्छा काजी भासिमा र प्रकाश मानन्धरले स्थानीय अनुहारलाई क्यानभासमा उतार्दा लक्ष्मीप्रसाद खोटेजाले ग्रामीण भेकबाट लोपोन्मुख बन्दै गइरहेको ढुंगा धारामार्फत भोटेकोसी सभ्यताको कथा भनेका छन् ।
त्यस्तै राधेश्याम कर्माचार्य, राजेन्द्रप्रसाद याकमी, प्रकाशचन्द्र श्रेष्ठले स्थानीय मन्दिर र आसपासको दृश्य कैद गरेका छन् भने सूर्यराम सुवालले हिमालबाट बग्दै आएको भोटेकोसीलाई नै क्यानभासमा उतारेका छन् । कलामार्फत समाजमा रहेका सांस्कृतिक वैभवलाई बाहिर ल्याउने उद्देश्यका साथ प्रदर्शनीको आयोजना गरिएको कार्यशाला संयोजन गरेका चित्रकार दिवेश प्रधानले बताए । उनले समृद्ध नेपाल बनाउने अभियानमा कलाकारले योगदान दिनुपर्छ भन्ने ध्येय राखेर कार्यशाला तथा प्रदर्शनी गरिएको जिकिर गरे ।
कार्यशाला तथा प्रदर्शनीका संयोजक प्रकाश खड्काले भोटेकोसीको सभ्यताको उत्खनन्मा सहयोग पुगोस् भन्ने हेतुका साथ कार्यक्रमको आयोजना गरिएको बताए।
