स्याउ खेती प्रायः हिमाली भेगमा गरिन्छ। पछिल्ला दिनमा भने हिमाल नजिक र पहाडी भेगका बस्तीमा पनि यसले सफलता पाएको छ। पाल्पाको रैनादेवी छहराका विभिन्न स्थानमा किसान आफैंले गरेको परीक्षणमा स्याउले राम्रो दाना लगाएको छ। छहरा, मुझुङ, बराङदी, पालुङमैनादीलगायत चिसा ठाउँमा स्याउ फलेको छ।
विभिन्न स्थानमा परीक्षणका लागि लगाएका स्याउमा राम्रो फल लागेको छ। बोट हुर्केका छन्। किसानका अनुसार यसलाई सफल परीक्षण मान्न सकिन्छ। रैनादेवी–४ छहराका लक्ष्मण रायमाझीको घरमा लगाएको स्याउका बोटमा तीन सयभन्दा बढी दाना फलेका छन्। 'गत वर्ष एउटै बोटमा ४ सयभन्दा बढी दाना फल्यो,' उहाँले भन्नुभयो, 'यसरी फल्छ/फल्दैन भन्ने कुरामा दोधारमा भएर बिरुवा लगाइएको हो।'
मुस्ताङ घुम्न जाँदा बोटमै टिपेर स्याउ खाएको अनुभव अहिले घरमै लिन पाएको बताउँदै उहाँले यहाँ फलेको स्याउको स्वाद पनि मिठो र मुस्ताङको मार्फामा टिपेर खाएको उस्तै लागेको बताउनुभयो। कृषिविज्ञका अनुसार स्याउ मध्यम चिसो, चिसो र हिमाली भेगमा फल्छ । मध्यम चिसोका लागि आवश्यक पर्ने जात कृस्पिन, रेड जुन, कक्स, अरेन्ज पिपिनलगायत छन्। जुन स्याउ १ हजार ५ सयदेखि २ हजार मिटरसम्को उचाइमा उपयुक्त हुन्छ। कान्तिपुर अनलाइनका अनुसार कम चिसो आवश्यक पर्ने जातमा अन्ना भोरिड, ट्रपिकल ब्युटीलगायत १ हजार २ सयदेखि १ हजार ५ सयसम्मको उचाइमा फल्छन्।