د تايوان مسئلې په کارولو سره د چين کنټرول غوښتونکي به خامخا ناکام وي.

د امريکا د استازيو جرګې د سې شنبې يعنې د مې په ۹مه نېټه د تش په نامه د ۲۰۱۹ کال د تايوان د ډاډ قانوني لايحه او تايوان ته او ور سره د اړيکو په قانون کې د خپلو کړو ژمنو د بيا تائيدولو پرېکړه ليک تصويب کړ. دا د تايوان مسئلې په کارولو سره د چين په کورنيو چارو کې د امريکا بربنډه لاسوهنه او د چين د سوله ييز پرمختګ د مخنيوي په موخه د دغه هېواد ډېره خطرناکه سياسي کړنه ده چې ترې د ځينو امريکايانو لخوا د سياسي توطيې د لوبولو بد نيت څرګندېږي. که امريکا په خپل سر دغو کړو وړو ته دوام ورکړي، په ځينو مهمو ساحو کې د چين او امريکا ترمنځ همکارۍ، د تايوان تنګي سولې او ثبات ته به سخت زيانونه ورسېږي. چين له دې سره ټينګ مخالفت کوي او ور څخه د جدي خبرو غوښتونکی دی.

د امريکا په پارلمان کې ناست سياست وال دې په دې پوه شي: هره هڅه چې غواړي د تايوان مسئلې په کارولو سره چين کنټرول کړي، خامخا به له ناکامۍ سره مخ شي. ځکه چې دغه ډول هڅه ۳ لويې تېروتنې لري.

لومړۍ تېروتنه: دغه ډول هڅه د چين او امريکا ترمنځ د اړيکو پرمختيايي بنسټ بيخي ويجاړوي. دا چې د امريکا د استازيو مجلس غواړي له تايوان سره د حاکميت لرونکو هېوادونو ترمنځ د پوځي همکارۍ اړيکې ټينګې کړي، د يو چين د پېژندلو له اصولو څخه ښکاره سرغړونه ده او د نړيوالو قوانينو بنسټيز مقرارت او خپلې نړيوالې وظيفې سختې ويجاړوي.

دوهمه تېروتنه: امريکا هڅه کوي چې د تايوان مسئلې په پلمه د چين د بنسټيزې کرښې ازموينه وکړي. تايوان هېڅکله د چين او امريکا ترمنځ د چنې وهلو وسيله نه ده. تايوان مسئله د چين کورنۍ چارې دي او د چين په ملي مرکزي ګټو او د ۱ مليارډ او ۴۰۰ مليونو چينايانو پر ملي شرافت او احساساتو پورې تړاو لري چې د بهرنيو ځواکونو د مداخلې او معاملې وړ نه ده.

درېيمه تېروتنه دا ده چې دغه ډول هڅه به د تايوان تنګي حالاتو د ترينګلتيا، سيمه ييزې سولې او ثبات ته د زيان رسولو سبب وګرځي. امريکايي سياست وال بايد د خپل پخواني ولسمشر جيمي کارټر هغه ليکنه چې د چين او امريکا ترمنځ د اړيکو ټينګښت د ۴۰مې کليزې په مناسبت يې ليکلې، په جدي توګه ولولي او په دې بايد ښه پوه شي: که تايوان مسئله په مناسبه توګه حل نه شي، نو ممکن سيمه ييزه کشاله يا شخړه به رامنځته شي او ټولې نړۍ ته به ناورينونه ورسېږي. دا يوه جدي خبره ده.