ចំពោះវិធានការឆ្លើយតបរបស់ក្រសួងពាណិជ្ជកម្មចិន កាលពីយប់ថ្ងៃទី ១៨ ខែមិថុនា រដ្ឋាភិបាលអាមេរិកបានចេញសេចក្តីថ្លែងការណ៍មួយទៀត ព្រមានថានឹងបន្ថែមអត្រាពន្ធចំនួន ១០ % ទៀតទៅលើផលិតផលចិនដែលមានតម្លៃសរុបដល់ទៅ ២០០ ប៊ីលានដុល្លាអាមេរិក ក្រៅពីបញ្ជីផលិតផលចិនដែលត្រូវបន្ថែមបង់ពន្ធចំនួន ៥០ ប៊ីលានដុល្លាអាមេរិកដែលបានប្រកាសកាលពីមុន ក្នុងបំណងសងសឹកទៅនឹងការដែលប្រទេសចិន “ មិនចង់កែប្រែទង្វើអយុត្តិធម៌ពាក់ព័ន្ធនឹងការទិញកម្មសិទ្ធិបញ្ញានិងបច្ចេវិទ្យារបស់អាមេរិក” ។
ឆ្លើយតបទៅនឹងបញ្ហានេះ ក្រសួងពាណិជ្ជកម្មចិនបានចេញសេចក្តីថ្លែងការណ៍មួយដោយបានរិះគន់ថា ទង្វើគំរាមកំហែងដាក់សម្ពាធនិងការបោកបញ្ឆោតបន្លំយ៉ាងធ្ងន់ធ្ងររបស់អាមេរិក គឺផ្ទុយឆ្ងាយពីមតិឯកភាពនៃការពិគ្រោះពិភាក្សាច្រើនលើកច្រើនដងរបស់ភាគីទាំងពីរ បណ្តាលឲ្យសហគមន៍អន្តរជាតិខកចិត្តយ៉ាងខ្លាំងចំពោះអាមេរិក។
“ ភេរវនិយមពាណិជ្ជកម្ម ” មិនអាចជួយសង្គ្រោះអាមេរិកបានទេ ថែមទាំងធ្វើឲ្យខូចខាតយ៉ាងធ្ងន់ធ្ងរដល់សកលភាវូបនីយកម្មសេដ្ឋកិច្ច យន្តការពាណិជ្ជកម្មពហុភាគី និងខ្សែសង្វាក់ផលិតកម្មពិភពលោក។ ដូច្នេះ ចាប់ពីដើមរហូតមក ប្រទេសចិនប្រកាន់អាកប្បកិរិយាច្បាស់លាស់ ពោលគឺ នឹង“ ការពារយ៉ាងម៉ឹងម៉ាត់នូវផលប្រយោជន៍ប្រជាជននិងប្រទេសជាតិ ការពារយ៉ាងម៉ឺងម៉ាត់នូវសកលភាវូបនីយកម្មសេដ្ឋកិច្ចនិងយន្តការពាណិជ្ជកម្មពហុភាគី ”។
ឥឡូវនេះ នៅពេលប្រឈមមុខនឹងទង្វើឆ្កួតៗរបស់អាមេរិក សហគមន៍អន្តរជាតិចាំបាច់ត្រូវតែចាប់ដៃគ្នាឲ្យបានឆាប់ ដើម្បីរួមគ្នាធ្វើការប្រឆាំង រួមគ្នាយកជ័យជម្នះពី “សង្គ្រាមប្រឆាំងភេរវកម្ម” ផ្នែកពាណិជ្ជកម្មនេះ !