នៅរសៀលថ្ងៃទី ១៧ ខែកញ្ញា តាមម៉ោងក្នុងតំបន់ លោកLi Keqiang នាយករដ្ឋមន្រ្តីចិននិងលោកDmitry Medvedev នាយករដ្ឋមន្រ្តីរុស្ស៊ីបានរួមគ្នាធ្វើជាសហអធិបតីនៃកិច្ចជំនួបតាមពេលកំណត់រវាងនាយករដ្ឋមន្រ្តីចិននិងរុស្ស៊ីលើកទី ២៤ នៅក្រុងSaint-Petersburg ប្រទេសរុស្ស៊ី ។
លោកLi Keqiang បានថ្លែងថា ឆ្នាំ ២០១៩ នេះជាខួបទី ៧០ នៃការបង្កើតចំណងការទូតរវាងប្រទេសចិននិងរុស្ស៊ី ។ ទំនាក់ទំនងរវាងប្រទេសទាំងពីរបាននិងកំពុងវិវឌ្ឍរីកចម្រើនប្រកបដោយភាពនឹងនរ និងរឹងមាំ ។ ក្រោមបរិបទដែលស្ថានការណ៍នយោបាយនិងសេដ្ឋកិច្ចអន្តរជាតិមានកត្តាមិនប្រាកដប្រជានិងអស្ថិរភាពកាន់តែច្រើនឡើងៗ ប្រទេសចិននិងរុស្ស៊ីគួរបង្កើនកិច្ចសម្របសម្រួលជាយុទ្ធសាស្រ្ត បង្កើនទំនុកចិត្តផ្នែកនយោបាយទៅវិញទៅមក ពង្រីកកិច្ចសហប្រតិបត្តិការប្រាកដប្រជា ធ្វើឱ្យការផ្លាស់ប្តូរខាងវប្បធម៌មនុស្សជាតិមានភាពកាន់តែស្អិតល្មួត ដែលនេះមិនគ្រាន់តែមានអំណោយផលដល់ប្រទេសទាំងពីរប៉ុណ្ណោះទេ ថែមទាំងបានបញ្ចេញសញ្ញាវិជ្ជមានក្នុងការគាំពារភាពរុងរឿងនិងស្ថិរភាពក្នុងតំបន់ក៏ដូចជាពិភពលោកទាំងមូលផងដែរ ។
ដោយឡែក លោក Dmitry Medvedev បានលើកឡើងថា ការអភិវឌ្ឍទំនាក់ទំនងជាមួយភាគីចិនជាទិសដៅការទូតជាអាទិភាពរបស់រុស្ស៊ី ហើយក៏ជាតម្រូវការដែលសមស្របនឹងការអភិវឌ្ឍរបស់រុស្ស៊ីផងដែរ ។ ប្រទេសរុស្ស៊ីរីករាយធ្វើឱ្យស៊ីជម្រៅនូវការប្រាស្រ័យទាក់ទងជាយុទ្ធសាស្រ្តនិងកិច្ចសហប្រតិបត្តិការប្រាកដប្រជាជាមួយប្រទេសចិន ហើយស្របនឹងពេលធ្វើកិច្ចសហប្រតិបត្តិការលើវិស័យប្រពៃណីដូចជាវិស័យថាមពលជាដើម ក៏នឹងពង្រីកកិច្ចសហប្រតិបត្តិការលើវិស័យបច្ចេកវិទ្យាខ្ពស់ដូចជាបច្ចេកវិទ្យាវៃឆ្លាតនិងមនុស្សយន្តជាដើម ព្រមនិងពង្រីកទំហំពាណិជ្ជកម្មទ្វេភាគីថែមទៀត សំដៅខិតខំសម្រេចគោលដៅដែលធ្វើឱ្យទំហំពាណិជ្ជកម្មរបស់ប្រទេសទាំងពីរកើនឡើងទ្វេដង ។
បន្ទាប់ពីកិច្ចជំនួប លោកLi Keqiang និងលោកDmitry Medvedev បានចុះហត្ថលេខាលើ«សេចក្តីប្រកាសរួមនៃកិច្ចជំនួបតាមពេលកំណត់រវាងនាយករដ្ឋមន្រ្តីចិននិងរុស្ស៊ីលើកទី ២៤» ព្រមនិងធ្វើជាសាក្សីក្នុងពិធីចុះហត្ថលេខាលើឯកសារជាង ១០ ស្តីពីកិច្ចសហប្រតិបត្តិការរវាងភាគីទាំងពីរផងដែរ ៕
