រសៀលថ្ងៃទី ១៤ ខែវិច្ឆិកានៅទីស្តីការប្រធានរដ្ឋនៅក្រុងវៀងចន្ទន៍ លោក Boungnang Vorachith អគ្គលេខាធិការនៃគណៈកម្មាធិការមជ្ឈិមបក្សបដិវត្តន៍ប្រជាជន និងជាប្រធានរដ្ឋនៃប្រទេសឡាវបានជួបពិភាក្សាជាមួយលោក Wei Fenghe សមាជិកក្រុមប្រឹក្សាកិច្ចការរដ្ឋនិងជារដ្ឋមន្ត្រីការពារជាតិចិនដែលអញ្ជើញទៅបំពេញទស្សនកិច្ចនៅប្រទេសឡាវ ។
ក្នុងកិច្ចជំនួប លោក Boungnang Vorachith បានលើកឡើងថា ប្រទេសឡាវចងចាំមិនភ្លេចរហូតនូវការគាំទ្រនិងជំនួយឧបត្ថម្ភដ៏ថ្លៃថ្លារបស់ប្រទេសចិនក្នុងរយៈពេលជាយូរកន្លងមក ហើយនឹងប្រកាន់ខ្ជាប់គោលនយោបាយចិនមួយដូចពេលកន្លងទៅ ។ បក្សនិងរដ្ឋាភិបាលឡាវគាំទ្រយ៉ាងពេញទំហឹងចំពោះការធ្វើឱ្យកិច្ចសហប្រតិបតិ្តការនិងការផ្លាស់ប្តូរលើគ្រប់វិស័យនិងគ្រប់ស្រទាប់ជាន់ថ្នាក់រវាងកងទ័ពនៃប្រទេសទាំងពីរឱ្យកាន់តែស៊ីជម្រៅនិងមានភាពប្រាកដប្រចាជាបន្តបន្ទាប់ ក៏ដូចជាបង្កើនសាមគ្គីភាពនិងមិត្តភាពរវាងប្រទេសទាំងពីរផងដែរ ។
ជាការឆ្លើយតប លោក Wei Fenghe បានថ្លែងថា ប្រទេសចិនសូមថ្លែងអំណរគុណដល់ប្រទេសឡាវដែលបានផ្តល់ការគាំទ្រយ៉ាងមុតមាំក្នុងបញ្ហាពាក់ព័ន្ធនិងផលប្រយោជន៍ស្នូលរបស់ប្រទេសចិន ។ កងទ័ពចិនរីករាយរួមសហការចាមួយកងទ័ពឡាវក្នុងន័យអនុវត្តបានឱ្យល្អនូវមតិឯកភាពរួមសំខាន់ៗនៃអ្នកដឹកនាំកំពូលរបស់បក្សនិងរដ្ឋនៃប្រទេសទាំងពីរ ដើម្បីបង្កើនការប្រាស្រ័យទាក់ទងជាយុទ្ធសាស្ត្រ ក៏ដូចជាធ្វើឱ្យស៊ីជម្រៅនូវកិច្ចសហប្រតិបតិ្តការជាក់ស្តែងផងដែរ ៕
