យប់ជ្រៅថ្ងៃទី ២៥ ខែ មករា កងកម្លាំងការពារជាតិរបស់ប្រទេសអ៊ីស្រាអែលបានចេញផ្សាយសេចក្តីថ្លែងការណ៍ថា នៅយប់ថ្ងៃដដែលនោះ កងកម្លាំងអ៊ីស្រាអែលបានចាត់បញ្ជូនយន្តហោះចម្បាំងទៅទម្លាក់គ្រាប់បែកទៅលើគោលដៅយោធារបស់អង្គការ Hamasជាច្រើន ដែលស្ថិតនៅភាគខាងត្បូងតំបន់ Gaza ។
សេចក្តីថ្លែងការណ៍បានឱ្យដឹងថា នៅថ្ងៃដដែលនោះ បាឡុងដែលមានផ្ទុះគ្រឿងបំផ្ទុះបានហោះហើរពីតំបន់ Gaza ចូលក្នុងដែនអ៊ីស្រាអែល ។ ជាការឆ្លើយតប យន្តហោះចម្បាំងនៃកងកម្លាំងអ៊ីស្រាអែលបានទម្លាក់គ្រាប់បែកទៅលើគោលដៅយោធា របស់អង្គការ Hamasជាច្រើន ដែលស្ថិតនៅភាគខាងត្បូងតំបន់ Gaza ក្នុងនោះ រួមមានទាំងមូលដ្ឋានផលិតអាវុធមួយនិងបន្ទាយយោធាមួយផង ។
ដំណឹងដែលមកពីភាគីប៉ាឡេស្ទីនបានឱ្យដឹងថា ការទម្លាក់គ្រាប់បែករបស់កងកម្លាំងអ៊ីស្រាអែលលើកនេះមិនបានបណ្តាលឱ្យមានមនុស្សស្លាប់បាត់បង់ជីវិតនិងរងរបួសនោះទេ ៕
