កាលពីថ្ងៃទី ២៧ ខែតុលា នៅវិមានសភាប្រជាជននៅក្រុងប៉េកាំង លោកLi Zhanshu ប្រធានគណៈកម្មាធិការអចិន្ត្រៃយ៍នៃសភាតំណាងប្រជាជនទូទាំងប្រទេសចិនបានអញ្ជើញចូលរួមកិច្ចប្រជុំតាមវីដេអូខុនហ្វឺរិននៃវេទិកាសភាប្រទេសBRICSលើកទី៦ និងថ្លែងសុន្ទរកថា ។
ថ្លែងក្នុងកិច្ចប្រជុំ លោកLi Zhanshuបានលើកឡើងថា ពីខែមករាដល់ខែកញ្ញា ឆ្នាំ ២០២០ ផលិតផលក្នុងស្រុកសរុបនៃប្រទេសចិនបានកើនឡើង ០,៧% ដែលបានធ្វើឱ្យប្រទេសចិនក្លាយទៅជាអង្គភាពសេដ្ឋកិច្ចសំខាន់ទីមួយដែលមានកំណើនវិជ្ជមានគិតតាំងពីការផ្ទុះរីករាលដាលជំងឺកូវីដ ១៩ មក ដែលបានបំពេញបន្ថែមនូវកម្លាំងចលករនិងជំនឿចិត្តក្នុងការស្តារសេដ្ឋកិច្ចពិភពលោកឡើងវិញ ។
លោកLi Zhanshuបានលើកឡើងនូវសំណើបួនចំណុចស្តីពីការបង្កើនកិច្ចសហប្រតិបត្តិការរវាងស្ថាប័ននីតិប្បញ្ញត្តិនៃប្រទេសBRICS ពោលគឺ៖
ទី ១ ពង្រឹងនិងពង្រីកកិច្ចសហប្រតិបត្តិការលើវិស័យសុខាភិបាលសាធារណៈ ដើម្បីជួយបង្កើនការបង្ការនិងគ្រប់គ្រងការរីករាលដាលនៃជំងឺឆ្លងដោយតាមផ្លូវច្បាប់ ។
ទី ២ ប្រកាន់ខ្ជាប់ការបើកទូលាយនិងការអភិវឌ្ឍដោយនវានុវត្តន៍ ដើម្បីផ្តល់ការទ្រទ្រង់ផ្នែកផ្លូវច្បាប់ដល់ការស្តារសេដ្ឋកិច្ចពិភពលោកឡើងវិញ ។
ទី ៣ គាំពារយ៉ាងមុតមាំនូវអានុភាពនៃច្បាប់អន្តរជាតិ ដើម្បីជំរុញការកសាងសណ្តាប់ធ្នាប់អន្តរជាតិឱ្យកាន់តែមានភាពយុត្តិធម៌និងសមហេតុផល ។
ទី ៤ ធ្វើឱ្យស៊ីជម្រៅនូវកិច្ចសហប្រតិបត្តិការរវាងស្ថាប័ននីតិប្បញ្ញត្តិក្រោមយន្តការប្រទេសBRICS។