លោកស៊ីជីនភីង ប្រធានរដ្ឋចិនបានជួបសន្ទនាតាមទូរស័ព្ទជាមួយលោកBiden ប្រធានាធិបតីអាមេរិកនៅព្រឹកថ្ងៃទី ១០ ខែកញ្ញាតាមការណាត់ ដើម្បីធ្វើការផ្លាស់ប្តូរមតិយោបល់ជាលក្ខណៈយុទ្ធសាស្ត្រដោយស្មោះត្រង់ស៊ីជម្រៅនិងទូលំទូលាយជុំវិញទំនាក់ទំនងរវាងចិននិងអាមេរិកនិងបញ្ហាដែលភាគីទាំងពីរយកចិត្តទុកដាក់ដូចគ្នា ។
ថ្លែងក្នុងកិច្ចជំនួប លោកស៊ីជីនភីងបានគូសបញ្ជាក់ថា ពេលបច្ចុប្បន្ននេះ សហគមន៍អន្តរជាតិកំពុងជួបបញ្ហាលំបាករួមជាច្រើន ហេតុនេះ ចិននិងអាមេរិកគួរតែមានចក្ខុវិស័យវែងឆ្ងាយ និងមានទំនួលខុសត្រូវ បន្តដើរឆ្ពោះទៅមុខដោយប្រកាន់ខ្ជាប់គំនិតយុទ្ធសាស្ត្រនិងគោលនយោបាយ ដើម្បីជំរុញឱ្យទំនាក់ទំនងចិននិងអាមេរិកឱ្យវិលត្រឡប់ទៅកាន់ផ្លូវអភិវឌ្ឍន៍យ៉ាងត្រឹមត្រូវនិងមានស្ថិរភាពក្នុងពេលឆាប់ៗ ក្នុងន័យផ្តល់ផលប្រយោជន៍ដល់ប្រជាជននៃប្រទេសទាំងពីរនិងប្រជាជននៃប្រទេសនានាលើពិភពលោក ។
ជាការឆ្លើយតប លោកBiden បានថ្លែងថា ពិភពលោកកំពុងមានការប្រែប្រួលយ៉ាងឆាប់រហ័ស ទំនាក់ទំនងរវាងអាមេរិកនិងចិនជាទំនាក់ទំនងទ្វេភាគីដ៏សំខាន់បំផុតមួយលើពិភពលោក ។ និន្នាការនៃទំនាក់ទំនងអាមេរិកនិងចិននឹងជះឥទ្ធិពលយ៉ាងខ្លាំងដល់អនាគតនៃពិភពលោក ។ ហេតុនេះ ភាគីអាមេរិកមានឆន្ទៈរួមសហការជាមួយភាគីចិនដើម្បីធ្វើការផ្លាស់ប្តូរដោយស្មោះត្រង់និងកិច្ចសន្ទនាប្រកបដោយលក្ខណៈស្ថាបនាឱ្យបានកាន់តែច្រើនថែមទៀត ដើម្បីជំរុញឱ្យទំនាក់ទំនងអាមេរិកនិងចិនវិលត្រឡប់ទៅកាន់ផ្លូវអភិវឌ្ឍន៍ដ៏ត្រឹមត្រូវវិញ ។