ថ្ងៃទី ១៩ ខែមករា លោក ពូទីនប្រធានាធិបតីរុស្ស៊ីបានបើកធ្វើកិច្ចជំនួបជាមួយលោក រ៉ាហ៊ី ប្រធានាធិបតីអ៊ីរ៉ង់ដែលកំពុងបំពេញទស្សនកិច្ចនៅរុស្ស៊ីនៅក្រុងមូស្គូ ដើម្បីពិភាក្សាអំពីកិច្ចសហប្រតិបត្តិការទ្វេភាគីនិងបញ្ហាសំខាន់ៗលើអន្តរជាតិនិងក្នុងតំបន់ ។
តាមដំណឹងដែលចេញផ្សាយដោយគេហទំព័រវិមានក្រឹមឡាំង លោក ពូទីន បានថ្លែងថា ប្រទេសរុស្ស៊ីនិងអ៊ីរ៉ង់កំពុងអនុវត្តគម្រោងធំៗមួយចំនួននិងធ្វើសហប្រតិបត្តិការលើវិស័យជាច្រើន។ ភាគីរុស្ស៊ីសង្ឃឹមថា នឹងស្វែងយល់ពីជំហររបស់ភាគីអ៊ីរ៉ង់លើបញ្ហាដូចជាអាហ្វហ្គានីស្ថាននិងកិច្ចព្រមព្រៀងនុយក្លេអ៊ែរអ៊ីរ៉ង់ជាដើមតាមរយៈកិច្ចជំនួបលើកនេះ ។ លោក រ៉ាហ៊ី បានថ្លែងថា អ៊ីរ៉ង់រីករាយក្នុងការអភិវឌ្ឍទំនាក់ទំនងប្រកបដោយស្ថិរភាពនិងគ្រប់ជ្រុងជ្រោយជាមួយរុស្ស៊ី ។ អ៊ីរ៉ង់និងរុស្ស៊ីអាចបង្កើនកិច្ចសហប្រតិបត្តិការនិងសម្របសម្រួលផ្នែកប្រឆាំងនឹងសកម្មភាពឯកតោភាគីរបស់ប្រទេសលោកខាងលិច រួមទាំងសហរដ្ឋអាមេរិកផង ៕
